[1161] |1161.1| Kusalañceva no brahme atho brahme anāmayaṃ atho uñchena yāpema atho mūlaphalā bahū. |1161.2| Atho ḍaṃsā makasā ca appameva siriṃsapā vane vāḷamigākiṇṇe hiṃsā mayhaṃ na vijjati. |1161.3| Satta no māse vasataṃ araññe jīvisokinaṃ idaṃpi paṭhamaṃ passāmi brāhmaṇaṃ devavaṇṇinaṃ ādāya veḷuvaṃ daṇḍaṃ aggihuttaṃ kamaṇḍaluṃ. |1161.4| Svāgatante mahābrahme atho te adurāgataṃ anto pavisa bhaddante pāde pakkhālayassu te.

[1162] Yathā vārivaho pūro sabbakālaṃ na khīyati evantaṃ yācitāgañchiṃ putte me dehi yācito.

[1163] |1163.1| Dadāmi na vikampāmi issaro naya brāhmaṇa pāto gatā rājaputtī sāyaṃ uñchāto ehiti |1163.2| ekarattiṃ vasitvāna pāto gacchasi brāhmaṇa. Tassā nhāto upagghāte atha ne māladhārine |1163.3| ekarattiṃ vasitvāna pāto gacchasi brāhmaṇa. Nānāpupphehi sañchanne nānāgandhehi bhūsite nānāmūlaphalākiṇṇe gaccha svādāya brāhmaṇa.

[1164] |1164.1| Na vāsamabhirocāmi gamanaṃ mayhaṃpi ruccati antarāyopi me assa gacchaññeva rathesabha. |1164.2| Na hetā yācayogī naṃ antarāyassa kāriyā itthikā mantaṃ jānanti sabbaṃ gaṇhanti vāmato. |1164.3| Saddhāya dānaṃ dadato mā samadakkhi mātaraṃ Antarāyaṃpi sā kayirā gacchaññeva rathesabha. |1164.4| Āmantayassu te putte mā te mātaramaddasuṃ saddhāya dānaṃ dadato evaṃ puññaṃ pavaḍḍhati. |1164.5| Āmantayassu te putte mā te mātaramaddasuṃ mādisassa dhanaṃ datvā rāja saggaṃ gamissasi.