[1165] |1165.1| Sace tvaṃ nicchase daṭṭhuṃ mama bhariyaṃ patibbataṃ ayyakassapime dehi jāliṃ kaṇhājinaṃ cubho. |1165.2| Ime kumāre disvāna mañjuke piyabhāṇine patīto sumano vitto bahuṃ dassati te dhanaṃ.

[1166] Acchedanassa bhāyāmi rājaputta suṇohi me rājadaṇḍāya maṃ dajjā vikkīṇeyya haneyya vā chinno dhanañca dāse ca gārayhassa brahmabandhuyā.

[1167] Ime kumāre disvāna mañjuke piyabhāṇine dhamme ṭhito mahārājā sivīnaṃ raṭṭhavaḍḍhano laddhā pītisomanassaṃ bahuṃ dassati te dhanaṃ.

[1168] Nāhantaṃpi karissāmi yaṃ maṃ tvaṃ anusāsasi dārakeva ahaṃ nessaṃ brāhmaṇiyā paricārike.