[1173] |1173.1| Tato kumārā pakkāmuṃ brāhmaṇassa pamuñciya assupuṇṇehi nettehi pitaraṃ so udikkhati. |1173.2| Vedhamassatthapattaṃva pitu pādāni vandati pitu pādāni vanditvā idaṃ vacanamabravi. |1173.3| Ammā ca tāta nikkhantā tvañca no tāta dassasi yāva ammaṃpi passemu atha no tāta dassasi. |1173.4| Ammā ca tāta nikkhantā tavañca no tāta dassasi mā no tvaṃ tāta adadā yāva ammāpi eti no. Tadāyaṃ brāhmaṇo kāmaṃ vikkīṇātu hanātu vā |1173.5| balaṅkapādo addhanakho atho obaddhapiṇḍiko dīghottaroṭṭho capalo kaḷāro bhagganāsako. |1173.6| Kumbhodaro bhaggapiṭṭhī atho visamacakkhuko lohamassu haritakeso valīnaṃ tilakāhato. |1173.7| Piṅgalo ca vinato ca vikaṭo ca brahā kharo ajinānipi sannaddho amanusso bhayānako. |1173.8| Manusso udāhu yakkho maṃsalohitabhojano gāmā araññamāgamma dhanaṃ taṃ tāta yācati. |1173.9| Nīyamāne pisācena kinnu tāta udikkhasi asmā nūna te hadayaṃ ayasā daḷhabandhanaṃ.

[1174] |1174.1| Na me idaṃ tathā dukkhaṃ labbhā hi pumunā idaṃ yañca ammaṃ na passissaṃ taṃ me dukkhataraṃ ito. |1174.2| Na me idaṃ tathā dukkhaṃ labbhā hi pumunā idaṃ yañca tātaṃ na passissaṃ taṃ me dukkhataraṃ ito. |1174.3| Sā nūna kapaṇā ammā ciraṃ rattāya ruccati kaṇhājinaṃ apassantī kumāriṃ cārudassaniṃ. |1174.4| So nūna kapaṇo tāto ciraṃ rattāya ruccati kaṇhājinaṃ apassanto kumāriṃ cārudassaniṃ. |1174.5| Sā nūna kapaṇā ammā ciraṃ ruccati assame kaṇhājinaṃ apassantī kumāriṃ cārudassaniṃ. |1174.6| So nūna kapaṇo tāto ciraṃ ruccati assame kaṇhājinaṃ apassanto kumāriṃ cārudassaniṃ. |1174.7| Sā nūna kapaṇā ammā ciraṃ rattāya ruccati aḍḍharatteva ratte vā nadīva avasussati . |1174.8| So nūna kapaṇo tāto ciraṃ rattāya ruccati aḍḍharatteva ratte vā nadīva avasussati .