[1179] Nīyamānā kumārā te brāhmaṇassa pamuñciya tena tena padhāviṃsu jālī kaṇhājinā cubho.

[1180] Tato so rajjumādāya daṇḍañcādāya brāhmaṇo ākoṭayanto te neti sivirājassa pekkhato.

[1181] |1181.1| Taṃ taṃ kaṇhājināvoca ayaṃ maṃ tāta brāhmaṇo laṭṭhiyā paṭikoṭeti ghare jātaṃva dāsiyaṃ. |1181.2| Na cāyaṃ brāhmaṇo tāta dhammikā honti brāhmaṇā Yakkho brāhmaṇavaṇṇena khādituṃ tāta neti no nīyamāne pisācena kinnu tāta udikkhasi.

[1182] |1182.1| Ime no pādukā dukkhā dīgho caddhā suduggamo nīce volambake suriye brāhmaṇova tareti no. |1182.2| Okandāmhase bhūtāni pabbatāni vanāni ca sarassa sirasā vandāma supatitthe ca āpake. |1182.3| Tiṇalatāni osadhyo pabbatāni vanāni ca ammaṃ ārogyaṃ vajjātha ayaṃ no neti brāhmaṇo. |1182.4| Vajjantu bhonto ammañca maddiṃ asmāka mātaraṃ sace anuppatitukāmā khippaṃ anuppateyya no. |1182.5| Ayaṃ ekapadī eti ujuṃ gacchati assamaṃ tamevānuppateyyāsi api passesi no lahuṃ. |1182.6| Aho vata re jaṭinī vanamūlaphalahāriyā suññaṃ disvāna assamaṃ tante dukkhaṃ bhavissati. |1182.7| Ativelaṃ nu ammāya uñchāladdhaṃ anappakaṃ yā no bandhe na jānāti brāhmaṇena dhanesinā. |1182.8| Accāyikena luddena yo no gāvova sumbhati apajja ammaṃ passemu sāyaṃ uñchāto āgataṃ. |1182.9| Dajjā ammā brāhmaṇassa phalaṃ khuddena missitaṃ Tadāyaṃ asito chāto na bāḷhaṃ tarayeyya no. |1182.10| Sūnā ca vata no pādā bāḷhaṃ tāreti brāhmaṇo iti tattha vilapiṃsu kumārā mātugiddhino. Dārakapabbaṃ nāma.