[1185] Tassā lālappamānāya bahuṃ kāruññasañhitaṃ sutvā nelapatiṃ vācaṃ vāḷā panthā apakkamuṃ.

[1186] |1186.1| Imamhi naṃ padesamhi puttakā paṃsukuṇṭhitā paccuggatā maṃ tiṭṭhanti vacchā bālāva mātaraṃ. |1186.2| Imamhi naṃ padesamhi puttakā paṃsukuṇṭhitā paccuggatā maṃ tiṭṭhanti haṃsāvuparipallale. |1186.3| Imamhi naṃ padesamhi puttakā paṃsukuṇṭhitā paccuggatā maṃ tiṭṭhanti assamassāvidūrato. |1186.4| Te migā viya ukkaṇṇā samantāmabhidhāvino ānandino pamuditā vaggamānāva kampare tyajja putte na passāmi jāliṃ kaṇhājinaṃ cubho. |1186.5| Chagilīva migī chāpaṃ pakkhī muttāva pañjarā ohāya putte nikkhamma sīhīvāmisagiddhinī tyajja putte na passāmi jāliṃ kaṇhājinaṃ cubho. |1186.6| Idaṃ nesaṃ parakkantaṃ nāgānamiva pabbate citakā parikiṇṇāyo assamassāvidūrato tyajja putte na passāmi jāliṃ kaṇhājinaṃ cubho. |1186.7| Vālukāyapi okiṇṇā puttakā paṃsukuṇṭhitā samantāmabhidhāvanti na te passāmi dārake.