[1187] |1187.1| Kimidaṃ tuṇhībhūtosi api ratteva me mano kākolāpi na vassanti matā me nūna dārakā.

[1188] |1188.1| Idaṃ tato dukkhataraṃ sallaviddho yathā vaṇo tyajja putte na passāmi jāliṃ kaṇhājinaṃ cubho. |1188.2| Idaṃpi dutiyaṃ sallaṃ kampeti hadayaṃ mama yañca putte na passāmi tvañca maṃ nābhibhāsasi. |1188.3| Ajja ce me imaṃ rattiṃ rājaputta na saṃsasi maññe okkantasantaṃ maṃ pāto dakkhasi no mataṃ.

[1189] Nanu maddī varārohā rājaputtī yasassinī pāto gatāsi uñchāya kimidaṃ sāyamāgatā.

[1190] |1190.1| Nanu tvaṃ saddamassosi ye saraṃ pātumāgatā sīhassa vinadantassa byagghassa ca nikūjitaṃ. |1190.2| Ahu pubbanimittaṃ me vicarantyā brahāvane khaṇitto me hatthā patito uggīvañcāpi aṃsato.