[1191] |1191.1| Ahaṃ patiñca putte ca ācariyamiva māṇavo anuṭṭhitā divārattiṃ jaṭinī brahmacārinī. |1191.2| Ajināni paridahitvā vanamūlaphalahāriyā vicarāmi divārattiṃ tumhaṃ kāmā hi puttakā. |1191.3| Idaṃ suvaṇṇahāliddaṃ ābhataṃ paṇḍuveluvaṃ rukkhapakkāni cāhāsiṃ ime vo puttakīḷanā. |1191.4| Idaṃ mūḷālivattakaṃ sālukaṃ jiñjarodakaṃ bhuñja khuddena saṃyuttaṃ saha puttehi khattiya. |1191.5| Padumaṃ jālino dehi kumudaṃ pana kumāriyā māline passa naccante siviputtāni avhaya. |1191.6| Tato kaṇhājinā yāti nisāmehi rathesabha mañjussarāya vagguyā assamaṃ upagacchantiyā . |1191.7| Samānasukhadukkhamhā raṭṭhā pabbājitā ubho Api siviputte passesi jāliṃ kaṇhājinaṃ cubho. |1191.8| Samaṇe brāhmaṇe nūna brahmacariyaparāyane ahaṃ loke abhisasiṃ sīlavante bahussute tyajja putte na passāmi jāliṃ kaṇhājinaṃ cubho.

[1192] |1192.1| Ime te jambukā rukkhā vedisā sindhuvāritā vividhāni rukkhajātāni te kumārā na dissare. |1192.2| Assatthā panasā ceme nigrodhā ca kapitthanā vividhāni phalajātāni te kumārā na dissare. |1192.3| Ime tiṭṭhanti ārāme ayaṃ sītūdakā nadī yatthassu pubbe kīḷiṃsu te kumārā na dissare. |1192.4| Vividhāni pupphajātāni asmiṃ upari pabbate yānassu pubbe dhāriṃsu te kumārā na dissare. |1192.5| Vividhāni phalajātāni asmiṃ upari pabbate yānassu pubbe bhuñjiṃsu te kumārā na dissare. |1192.6| Ime te hatthikā assā balibaddhā ca no ime yehissu pubbe kīḷiṃsu te kumārā na dissare.

[1193] |1193.1| Ime sāmā sasolūkā bahukā kadalīmigā yehissu pubbe kīḷiṃsu te kumārā na dissare. |1193.2| Ime haṃsā ca koñcā ca mayurā citrapekhuṇā yehissu pubbe kīḷiṃsu te kumārā na dissare.

[1194] |1194.1| Imā tā vanagumbāyo pupphitā sabbakālikā yatthassu pubbe kīḷiṃsu te kumārā na dissare. |1194.2| Imā tā pokkharaṇī rammā cakkavākūpakūjitā maṇḍālakehi sañchannā padumuppalakehi ca yatthassu pubbe kīḷiṃsu te kumārā na dissare.