[1199] |1199.1| Anumodāmi te deva puttake dānamuttamaṃ datvā cittaṃ pasādehi bhiyyo dānaṃ dado bhava. |1199.2| Yo tvaṃ maccherabhūtesu manussesu janādhipa brāhmaṇassa adā dānaṃ sivīnaṃ raṭṭhavaḍḍhano.

[1200] Ninnāditā te paṭhavī saddo te tidivaṅgato samantā vijjutā āgū girīnaṃva paṭissutā.

[1201] |1201.1| Tassa te anumodanti ubho nāradapabbatā Indo ca brahmā ca pajāpatī ca somo yamo vessavaṇo ca rājā sabbe devānumodanti tāvatiṃsā saindakā. |1201.2| Iti maddī varārohā rājaputtī yasassinī vessantarassa anumodi puttake dānamuttamaṃ. Maddīpabbaṃ nāma.

[1202] Tato ratyā vivasane suriyassuggamanaṃ pati sakko brāhmaṇavaṇṇena pāto nesaṃ adissatha.