[1203] |1203.1| Kacci nu bhoto kusalaṃ kacci bhoto anāmayaṃ kacci uñchena yāpetha kacci mūlaphalā bahū. |1203.2| Kacci ḍaṃsā makasā ca appameva siriṃsapā vane vāḷamigākiṇṇe kacci hiṃsā na vijjati.

[1204] |1204.1| Kusalañceva no brahme atho brahme anāmayaṃ atho uñchena yāpema atho mūlaphalā bahū. |1204.2| Atho ḍaṃsā makasā ca appameva siriṃsapā vane vāḷamigākiṇṇe hiṃsā mayhaṃ na vijjati. |1204.3| Satta no māse vasataṃ araññe jīvisokinaṃ idaṃpi dutiyaṃ passāma brāhmaṇaṃ devavaṇṇinaṃ ādāya veluvaṃ daṇḍaṃ dhārentaṃ ajinakkhipaṃ. |1204.4| Svāgatante mahābrahme atho te adurāgataṃ Anto pavisa bhaddante pāde pakkhālayassu te. |1204.5| Tiṇḍukāni piyālāni madhuke kāsamāriyo phalāni khuddakappāni bhuñje brahme varaṃ varaṃ. |1204.6| Idaṃpi pāniyaṃ sītaṃ ābhataṃ girigabbharā tato piva mahābrahme sace tvaṃ abhikaṅkhasi. |1204.7| Atha tvaṃ kena vaṇṇena kena vā pana hetunā anuppattosi brahāraññaṃ taṃ me akkhāhi pucchito.

[1205] Yathā vārivaho pūro sabbakālaṃ na khīyati evantaṃ yācitāgacchiṃ bhariyaṃ me dehi yācito.

[1206] Dadāmi na vikampāmi yaṃ maṃ yācasi brāhmaṇa santaṃ nappaṭigūhāmi dāne me ramate mano.