[1219] |1219.1| Yo yācataṃ patiṭṭhāsi bhūtānaṃ dharaṇīriva so me vessantaro rājā puttedāsi vane vasaṃ. |1219.2| Yo yācataṃ gati āsi savantīnaṃva sāgaro so me vessantaro rājā puttedāsi vane vasaṃ.

[1220] |1220.1| Dukkaṭaṃ vata bho raññā saddhena gharamesinā kathaṃ nu puttake dajjā araññe avaruddhako. |1220.2| Imaṃ bhonto nisāmetha yāvantettha samāgatā kathaṃ vessantaro rājā puttedāsi vane vasaṃ. |1220.3| Dāsaṃ dāsiñca so dajjā assaṃ cassatarīrathaṃ hatthiñca kuñjaraṃ dajjā kathaṃ so dajja dārake.

[1221] Yassa nāssa ghare dāso asso cassatarīratho hatthī ca kuñjaro nāgo kiṃ so dajjā pitāmaha.

[1222] Dānamassa pasaṃsāma nāvanindāma potaka kathaṃ nu hadayaṃ āsi tumhe datvā vanibbake.