[1231] Tato kattā taramāno brāhmaṇassa avākari dāsīsataṃ dāsasataṃ gavaṃ hatthūsabhaṃ sataṃ jātarūpasahassañca potānaṃdāsi nikkayaṃ.

[1232] (dāsīsataṃ dāsasataṃ gavaṃ hatthūsabhaṃ sataṃ assatarīrathañceva sabbabhoge sataṃ sataṃ jātarūpasahassañca brāhmaṇassa dhanesino accāyikassa luddassa potānaṃdāsi nikkayaṃ 2-).

[1233] |1233.1| Nikkīṇitvā ca nhāpetvā bhojayitvāna dārake samalaṅkaritvā bhaṇḍehi uccaṅke upavesayuṃ. |1233.2| Sīsaṃ nhāte sucivatthe sabbābharaṇabhūsite rājā aṅke karitvāna ayyako paripucchatha. |1233.3| Kuṇḍale ghusite māle sabbālaṅkārabhūsite rājā aṅke karitvāna idaṃ vacanamabravi. |1233.4| Kacci ubho arogā te jāli mātāpitā tava kacci uñchena yāpenti kacci mūlaphalā bahū. |1233.5| Kacci ḍaṃsā makasā ca appameva siriṃsapā vane vāḷamigākiṇṇe kacci hiṃsā na vijjati.

[1234] |1234.1| Atho ubho arogā te deva mātāpitā mama Atho uñchena yāpenti atho mūlaphalā bahū. |1234.2| Atho ḍaṃsā makasā ca appameva siriṃsapā vane vāḷamigākiṇṇe hiṃsā nesaṃ na vijjati. |1234.3| Khaṇantālukalambāni viḷānitakkalāni ca kolaṃ bhallātakaṃ belaṃ sā no āhacca posati. |1234.4| Yañceva sā āharati vanamūlaphalahāriyā taṃ no sabbe samāgantvā rattiṃ bhuñjāma no divā. |1234.5| Ammā ca no kīsā paṇḍu āharantī dumapphalaṃ vātātapena sukhumālī padumaṃ hatthagataṃmiva. |1234.6| Ammāya patanūkesā vicarantyā brahāvane vane vāḷamigākiṇṇe khaggadīpinisevite. |1234.7| Kesesu jaṭaṃ bandhitvā kacche jallamadhārayi (dhārento brāhmaṇavaṇṇaṃ āsadañcamasañjaṭaṃ 2-) cammavāsī chamā seti jātavedaṃ namassati.