[1235] Puttā piyā manussānaṃ lokasmiṃ upapajjisuṃ na hi nūnamhākaṃ ayyassa putte sineho ajāyatha.

[1236] |1236.1| Dukkaṭañca hi no pota bhūnahaccaṃ kataṃ mayā yohaṃ sivīnaṃ vacanā pabbājesiṃ adūsakaṃ. |1236.2| Yaṃ me kiñci idha atthi dhanaṃ dhaññañca vijjati Etu vessantaro rājā siviraṭṭhe pasāsatu.

[1237] Na deva mayhaṃ vacanā ehiti sivisuttamo sayameva devo gantvāna siñca bhogehi atrajaṃ.

[1238] |1238.1| Tato senāpatiṃ rājā sañjayo ajjhabhāsatha atthī assā rathā patti senā sannāhayantu naṃ negamā ca maṃ anventu brāhmaṇā ca purohitā |1238.2| tato saṭṭhī sahassāni yodhino cārudassanā khippamāyantu sannaddhā nānāvaṇṇehilaṅkatā. |1238.3| Nīlavatthadharāneke pītāneke nivāsitā aññe lohitauṇhīsā suddhāneke nivāsitā khippamāyantu sannaddhā nānāvaṇṇehilaṅkatā. |1238.4| Himavā yathā gandharo pabbato gandhamādano nānārukkhehi sañchanno mahābhūtagaṇālayo. |1238.5| Osadhehi ca dibbehi disā bhāti pavāti ca khippamāyantu sannaddhā disā bhantu pavantu ca. |1238.6| Tato nāgasahassāni yojayantu catuddasa suvaṇṇakacche mātaṅge hemakappanivāsase . |1238.7| Āruḷhe gāmaṇīyebhi tomaraṅkusapāṇibhi khippamāyantu sannaddhā hatthikkhandhehi dassitā. |1238.8| Tato assasahassāni yojayantu catuddasa Ājāniyeva jātiyā sindhave sīghavāhane . |1238.9| Āruḷhe gāmaṇīyebhi indiyācāpadhāribhi khippamāyantu sannaddhā assapiṭṭhe alaṅkatā. |1238.10| Tato rathasahassāni yojayantu catuddasa ayosukatanemiyo suvaṇṇacitrapokkhare. |1238.11| Āropentu dhaje tattha cammāni kavacāni ca vipphālentu ca cāpāni daḷhadhammā pahārino khippamāyantu sannaddhā rathesu rathajīvino.