๙. สุกตาเวฬิยเถราปทาน (๒๒๙)

|๒๓๑.๔๓| อสิโต นาม นาเมน มาลากาโร อหํ ตทา อาเวฬํ ปคฺคเหตฺวาน รญฺโญ ทาตุํ วชามหํ ฯ |๒๓๑.๔๔| อสมฺปตฺโตมฺหิ ราชานํ อทฺทสํ สิขินายกํ หฏฺโฐ หฏฺเฐน จิตฺเตน พุทฺธสฺส อภิโรปยึ ฯ |๒๓๑.๔๕| เอกตฺตึเส อิโต กปฺเป ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ |๒๓๑.๔๖| ปญฺจวีเส อิโต กปฺเป ราชา โหมิ มหพฺพโล เวภาโร นาม นาเมน จกฺกวตฺติ มหพฺพโล ฯ |๒๓๑.๔๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สุกตาเวฬิโย เถโร อิมา คาถาโย อภาสิตฺถาติ ฯ สุกตาเวฬิยตฺเถรสฺส อปทานํ สมตฺตํ ฯ