๑. เอกปทุมิยเถราปทาน (๓๔๑)

|๓๔๓.๑| ปทุมุตฺตโร นาม ชิโน สพฺพธมฺมาน ปารคู ภวาภเว วิภาเวนฺโต ตาเรติ ๑- ชนตํ พหุํ ฯ |๓๔๓.๒| หํสราชา ตทา โหมิ ทิชานํ ปวโร อหํ ชาตสฺสรํ สโมคยฺห กีฬามิ หํสกีฬิตํ ฯ |๓๔๓.๓| ปทุมุตฺตโร โลกวิทู อาหุตีนํ ปฏิคฺคโห ชาตสฺสรสฺส อุปริ อาคจฺฉิ ตาวเท ชิโน ฯ |๓๔๓.๔| ทิสฺวานหํ เทวเทวํ สยมฺภุํ โลกนายกํ วณฺเฏ เฉตฺวาน ปทุมํ สตฺตปตฺตํ มโนรมํ ฯ |๓๔๓.๕| มุขตุณฺเฑน ปคฺคยฺห วิปฺปสนฺเนน ๒- เจตสา อุกฺขิปิตฺวาน คคเน พุทฺธเสฏฺฐํ อปูชยึ ฯ |๓๔๓.๖| ปทุมุตฺตโร โลกวิทู อาหุตีนํ ปฏิคฺคโห อนฺตลิกฺเข ฐิโต สตฺถา อกาสิ ๓- อนุโมทนํ ฯ |๓๔๓.๗| อิมินา เอกปทุเมน เจตนาปณิธีหิ จ กปฺปานํ สตสหสฺสํ วินิปาตํ น คจฺฉสิ ฯ |๓๔๓.๘| อิทํ วตฺวาน สมฺพุทฺโธ ชลชุตฺตมนามโก มม กมฺมํ ปกิตฺเตตฺวา อคมา เยน ปตฺถิตํ ฯ @เชิงอรรถ: ๑ ม. ตาเรสิ ฯ ๒ ม. ยุ. ปสนฺโน โลกนายเก ฯ ๓ ม. ยุ. อกาเม ฯ |๓๔๓.๙| สตสหสฺเส อิโต กปฺเป ยํ กมฺมมกรึ ตทา ทุคฺคตึ นาภิชานามิ พุทฺธปูชายิทํ ผลํ ฯ |๓๔๓.๑๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา เอกปทุมิโย เถโร อิมา คาถาโย อภาสิตฺถาติ ฯ เอกปทุมิยตฺเถรสฺส อปทานํ สมตฺตํ ฯ