๒. สตรังสิยเถราปทาน (๕๒)

|54.8| Ubbiddhaṃ selamāruyha nisīdi purisuttamo pabbatassāvidūramhi brāhmaṇo mantapāragū. |54.9| Upaviṭṭhaṃ mahāvīraṃ devadevaṃ narāsabhaṃ añjaliṃ paggahetvāna santhaviṃ lokanāyakaṃ. |54.10| Esa buddho mahāvīro varadhammappakāsako jalati aggikkhandhova bhikkhusaṅghapurakkhato. |54.11| Mahāsamuddovakkhobbho aṇṇavova duruttaro migarājāvasambhīto dhammaṃ deseti cakkhumā. |54.12| Mama saṅkappamaññāya padumuttaranāmako 1- bhikkhusaṅghe ṭhito satthā imā gāthā abhāsatha. |54.13| Yenāyaṃ añjali dinno buddhaseṭṭho ca thomito tiṃsakappasahassāni devarajjaṃ karissati. |54.14| Kappasatasahassamhi aṅgīrasasanāmako vivaṭṭacchado sambuddho uppajjissati tāvade. |54.15| Tassa dhammesu dāyādo oraso dhammanimmito sataraṃsīti nāmena arahā so bhavissati. |54.16| Jātiyā sattavassohaṃ pabbajiṃ anagāriyaṃ sataraṃsimhi nāmena pabhā niddhāvate mama. |54.17| Maṇḍape rukkhamūle vā jhāyī jhānarato ahaṃ dhāremi antimaṃ dehaṃ sammāsambuddhasāsane. |54.18| Saṭṭhikappasahassamhi caturo romanāmakā 2- sattaratanasampannā cakkavattī mahabbalā. |54.19| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. @Footnote: 1 Ma. Yu. padumuttaranāyako. 2 Ma. rāmanāmakā. Itthaṃ sudaṃ āyasmā sataraṃsiyo 1- thero imā gāthāyo abhāsitthāti. Sataraṃsiyattherassa apadānaṃ samattaṃ.