[104] |104.7| Suvaṇṇavaṇṇaṃ sambuddhaṃ nisabhājāniyaṃ yathā tidhāppabhinnaṃ mātaṅgaṃ kuñjaraṃva mahesinaṃ. |104.8| Obhāsentaṃ disā sabbā sālarājaṃva pupphitaṃ rathiyā paṭipajjantaṃ lokajeṭṭhaṃ naruttamaṃ . |104.9| Ñāṇe cittaṃ pasādetvā paggahetvāna añjaliṃ pasannacitto sumano siddhatthaṃ abhivādayiṃ. |104.10| Catunavute ito kappe yaṃ kammamakariṃ tadā duggatiṃ nābhijānāmi ñāṇasaññāyidaṃ phalaṃ. |104.11| Tesattatimhito kappe soḷasāsuṃ naruttamā sattaratanasampannā cakkavattī mahabbalā. |104.12| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā ñāṇasaññiko thero imā gāthāyo abhāsitthāti. Ñāṇasaññikattherassa apadānaṃ samattaṃ.