๑๕. มหาโลมหังสจริยา

|๓๕.๑๒๐| สุสาเน เสยฺยํ กปฺเปมิ ฉวฏฺฐิกํ อุปนิธาย ๑- คามมณฺฑลา อุปาคนฺตฺวา รูปํ ทสฺเสนฺติ นปฺปกํ ฯ |๓๕.๑๒๑| อปเร คนฺธญฺจ มาลญฺจ โภชนํ วิวิธํ พหุํ อุปายนานิ อุปเนนฺติ หฏฺฐา สํวิคฺคมานสา ฯ |๓๕.๑๒๒| เย เม ทุกฺขํ อุปหรนฺติ เย จ เทนฺติ สุขํ มม สพฺเพสํ สมโก โหมิ ทยา โกโป น วิชฺชติ ฯ |๓๕.๑๒๓| สุขทุกฺเข ตุลาภูโต ยเสสุ อยเสสุ จ สพฺพตฺถ สมโก โหมิ เอสา เม อุเปกฺขาปารมีติ ฯ มหาโลมหํสจริยํ ปณฺณรสมํ ฯ ตสฺสุทฺทานํ ยุธญฺชโย โสมนสฺโส อโยฆรภิเสน จ โสณนนฺโท มูคผกฺโข กปิราชา สจฺจสวฺหโย ฯ วฏฺฏโก มจฺฉราชา จ กณฺหทีปายโน อิสิ สุตโสโม ปุเร ๒- อาสิ สาโม จ เอกราชา ๓- จ อุเปกฺขาปารมี อาสิ อิติ วุตฺตํ มเหสินา ฯ เอวํ พหุวิธํ ทุกฺขํ สมฺปตฺติญฺจ พหูวิธํ ภวาภเว อนุภวิตฺวา ปตฺโต สมฺโพธิมุตฺตมํ ฯ ทตฺวา ทาตพฺพกํ ทานํ สีลํ ปูเรตฺวา อเสสโต นิกฺขมฺมปารมึ คนฺตฺวา ปตฺโต สมฺโพธิมุตฺตมํ ฯ @เชิงอรรถ: ๑ ม. อุปนิธายหํ ฯ ยุ. นิธายหํ ฯ ๒ ม. ยุ. ปุน อาสึ ฯ ๓ ม. ยุ. เอกราชหุ ฯ ปณฺฑิเต ปริปุจฺฉิตฺวา วิริยํ กตฺวาน อุตฺตมํ ขนฺติยา ปารมึ คนฺตฺวา ปตฺโต สมฺโพธิมุตฺตมํ ฯ กตฺวา ทฬฺหมธิฏฺฐานํ สจฺจวาจานุรกฺขิย เมตฺตาย ปารมึ คนฺตฺวา ปตฺโต สมฺโพธิมุตฺตมํ ฯ ลาภาลาเภ ยสายเส สมฺมานนาวมานเน สพฺพตฺถ สมโก หุตฺวา ปตฺโต สมฺโพธิมุตฺตมํ ฯ โกสชฺชํ ภยโต ทิสฺวา วิริยารมฺภญฺจ เขมโต อารทฺธวิริยา โหถ เอสา พุทฺธานุสาสนี ฯ วิวาทํ ภยโต ทิสฺวา อวิวาทญฺจ เขมโต สมคฺคา สขิลา โหถ เอสา พุทฺธานุสาสนี ฯ ปมาทํ ภยโต ทิสฺวา อปฺปมาทญฺจ เขมโต ภาเวถฏฺฐงฺคิกํ มคฺคํ เอสา พุทฺธานุสาสนี ฯ อิตฺถํ สุทํ ภควา อตฺตโน ปุพฺพจริยํ สมฺภาวยมาโน พุทฺธาปทานิยํ นาม ธมฺมปริยายํ อภาสิตฺถาติ ฯ จริยาปิฏกํ นิฏฺฐิตํ ฯ [๑]- @เชิงอรรถ: ๑ ยุ. ยสฺมา ปน อยํ ปาลิ ปรมฺปราย ลิกฺขิตา @ วิปลฺลตฺถกฺขรา ตสฺมา สายํ สุฏฺฐุ วิโสธิตา @ ปญฺญาสี โหติ นาเมน อนุเถเรน ธีมตา @ สาสนฺฏฐิติกาเมน พหุคนฺเธสุ อาคตํ @ อตฺถํ สํสนฺทิตฺวา มยา ตสฺส เตเชน ปาณิโน @ สมิทฺธสงฺกปฺปา โหนฺตุ เทวา รกฺขนฺตุ สาสนํ ฯ @ จริยาปิฏกปาลิ สมตฺตา ฯ