นยถาจิตตัสสกายกัมมันติกถา

Na yathācittassa kāyakammanti . āmantā. Aphassakassa kāyakammaṃ .pe. acittakassa kāyakammanti . na hevaṃ vattabbe .pe. nanu saphassakassa kāyakammaṃ .pe. sacittakassa kāyakammanti . Āmantā . hañci saphassakassa kāyakammaṃ .pe. sacittakassa kāyakammaṃ no vata re vattabbe na yathācittassa kāyakammanti.

Na yathācittassa kāyakammanti. Āmantā. Anāvajjantassa kāyakammaṃ .pe. apaṇidahantassa kāyakammanti . na hevaṃ vattabbe .pe. nanu āvajjantassa kāyakammaṃ .pe. paṇidahantassa kāyakammanti . āmantā . hañci āvajjantassa kāyakammaṃ .pe. Paṇidahantassa kāyakammaṃ no vata re vattabbe na yathācittassa kāyakammanti.

Na yathācittassa kāyakammanti. Āmantā. Nanu kāyakammaṃ cittasamuṭṭhānaṃ cittena saha jātaṃ cittena saha ekuppādanti . Āmantā . hañci kāyakammaṃ cittasamuṭṭhānaṃ cittena saha jātaṃ cittena saha ekuppādaṃ no vata re vattabbe na yathācittassa kāyakammanti.

Na yathācittassa kāyakammanti . āmantā . na abhikkamitukāmo abhikkamati na paṭikkamitukāmo paṭikkamati na āloketukāmo āloketi na viloketukāmo viloketi na sammiñjitukāmo sammiñjeti na pasāretukāmo pasāretīti . na hevaṃ vattabbe .pe. nanu abhikkamitukāmo abhikkamati paṭikkamitukāmo paṭikkamati āloketukāmo āloketi viloketukāmo viloketi sammiñjitukāmo sammiñjeti pasāretukāmo pasāretīti . Āmantā . hañci abhikkamitukāmo abhikkamati .pe. pasāretukāmo pasāreti no vata re vattabbe na yathācittassa kāyakammanti.

Na vattabbaṃ na yathācittassa kāyakammanti. Āmantā. Nanu atthi koci aññatra gacchissāmīti aññatra gacchati .pe. Aññaṃ pasāressāmīti aññaṃ pasāretīti . āmantā . hañci atthi koci aññatra gacchissāmīti aññatra gacchati .pe. Aññaṃ pasāressāmīti aññaṃ pasāreti tena vata re vattabbe na yathācittassa kāyakammanti. Na yathācittassa kāyakammantikathā. ----------