รูปังมัคโคติกถา

Maggasamaṅgissa rūpaṃ maggoti . āmantā . sārammaṇaṃ atthi tassa āvajjanā ābhogo samannāhāro manasikāro cetanā patthanā paṇidhīti . na hevaṃ vattabbe .pe. nanu anārammaṇaṃ natthi tassa āvajjanā .pe. paṇidhīti . āmantā . hañci anārammaṇaṃ natthi tassa āvajjanā .pe. paṇidhi no vata re vattabbe maggasamaṅgissa rūpaṃ maggoti.

Sammāvācā maggoti . āmantā . sārammaṇā atthi tāya āvajjanā .pe. paṇidhīti . na hevaṃ vattabbe .pe. Nanu anārammaṇā natthi tāya āvajjanā .pe. paṇidhīti . Āmantā. Hañci anārammaṇā natthi tāya āvajjanā .pe. paṇidhi no vata re vattabbe sammāvācā maggoti.

Sammākammanto .pe. sammāājīvo maggoti . Āmantā . sārammaṇo atthi tassa āvajjanā .pe. paṇidhīti . Na hevaṃ vattabbe .pe. nanu anārammaṇo natthi tassa āvajjanā .pe. paṇidhīti . āmantā . hañci anārammaṇo natthi tassa āvajjanā .pe. Paṇidhi no vata re vattabbe sammāājīvo maggoti.

Sammādiṭṭhi maggo sā ca sārammaṇā atthi tāya āvajjanā .pe. paṇidhīti . āmantā . sammāvācā maggo sā ca sārammaṇā atthi tāya āvajjanā .p. paṇidhīti . Na hevaṃ vattabbe .pe. sammādiṭṭhi maggo sā ca sārammaṇā atthi tāya āvajjanā .pe. paṇidhīti . āmantā . sammākammanto .pe. sammāājīvo maggo so ca sārammaṇo atthi tassa āvajjanā .pe. paṇidhīti . na hevaṃ vattabbe .pe. sammāsaṅkappo .pe. Sammāvāyāmo .pe. Sammāsati .pe.

Sammāsamādhi maggo so ca sārammaṇo atthi tassa āvajjanā .pe. paṇidhīti . āmantā . sammāvācā maggo sā ca sārammaṇā atthi tāya āvajjanā .pe. paṇidhīti . na hevaṃ vattabbe .pe. sammāsamādhi maggo so ca sārammaṇo atthi tassa āvajjanā .pe. paṇidhīti . āmantā . sammākammanto .pe. sammāājīvo maggo so ca sārammaṇo atthi tassa āvajjanā .pe. Paṇidhīti. Na hevaṃ vattabbe .pe.

Sammāvācā maggo sā ca anārammaṇā natthi tāya āvajjanā .pe. paṇidhīti . āmantā . sammādiṭṭhi maggo sā ca anārammaṇā natthi tāya āvajjanā .pe. paṇidhīti . Na hevaṃ vattabbe .pe. sammāvācā maggo sā ca anārammaṇā natthi tāya āvajjanā .pe. paṇidhīti . āmantā . sammāsaṅkappo .pe. sammāvāyāmo .pe. sammāsati .pe. sammāsamādhi maggo so ca anārammaṇo natthi tassa āvajjanā .pe. Paṇidhīti. Na hevaṃ vattabbe .pe.

Sammākammanto .pe. sammāājīvo maggo so ca anārammaṇo natthi tassa āvajjanā .pe. paṇidhīti . āmantā . Sammādiṭṭhi .pe. sammāsaṅkappo sammāvāyāmo sammāsati .pe. Sammāsamādhi maggo so ca anārammaṇo natthi tassa āvajjanā .pe. Paṇidhīti. Na hevaṃ vattabbe .pe.

Na vattabbaṃ maggasamaṅgissa rūpaṃ maggoti . Āmantā. Nanu sammāvācā sammākammanto sammāājīvo maggoti . āmantā. Hañci sammāvācā sammākammanto sammāājīvo maggo tena vata re vattabbe maggasamaṅgissa rūpaṃ maggoti. Rūpaṃ maggotikathā. ------------