ยถากัมมูปคตญาณกถา

Yathākammūpagatañāṇaṃ dibbacakkhunti . āmantā . Yathākammūpagatañca manasi karoti dibbena cakkhunā rūpaṃ passatīti . Na hevaṃ vattabbe .pe.

Yathākammūpagatañca manasi karoti dibbena cakkhunā rūpaṃ passatīti . āmantā . dvinnaṃ phassānaṃ dvinnaṃ cittānaṃ samodhānaṃ hotīti. Na hevaṃ vattabbe .pe.

Yathākammūpagatañāṇaṃ dibbacakkhunti . āmantā . Ime vata bhonto sattāti ca manasi karoti kāyaduccaritena samannāgatāti ca manasi karoti vacīduccaritena samannāgatāti ca manasi karoti manoduccaritena samannāgatāti ca manasi karoti ariyānaṃ upavādakāti ca manasi karoti micchādiṭṭhikāti ca manasi karoti micchādiṭṭhikammasamādānāti ca manasi karoti te kāyassa bhedā parammaraṇā apāyaṃ duggatiṃ vinipātaṃ nirayaṃ upapannāti ca manasi karoti ime vā pana bhonto sattāti ca manasi karoti kāyasucaritena samannāgatāti ca manasi karoti vacīsucaritena samannāgatāti ca manasi karoti manosucaritena samannāgatāti ca manasi karoti ariyānaṃ anupavādakāti ca manasi karoti sammādiṭṭhikāti ca manasi karoti sammādiṭṭhikammasamādānāti ca manasi karoti te kāyassa bhedā parammaraṇā Sugatiṃ saggaṃ lokaṃ upapannāti ca manasi karoti dibbena cakkhunā rūpaṃ passatīti. Na hevaṃ vattabbe .pe.

Yathākammūpagatañāṇaṃ dibbacakkhunti . āmantā . ime vata bhonto sattāti ca manasi karoti .pe. te kāyassa bhedā parammaraṇā sugatiṃ saggaṃ lokaṃ upapannāti ca manasi karoti dibbena cakkhunā rūpaṃ passatīti . āmantā . dvinnaṃ phassānaṃ davinnaṃ cittānaṃ samodhānaṃ hotīti. Na hevaṃ vattabbe .pe.

Yathākammūpagatañāṇaṃ dibbacakkhunti . āmantā . atthi koci adibbacakkhuko dibbacakkhuṃ appaṭiladdho anadhigato asacchikato yathākammūpagataṃ jānātīti . āmantā . hañci atthi koci adibbacakkhuko dibbacakkhuṃ appaṭiladdho anadhigato asacchikato yathākammūpagataṃ jānāti no vata re vattabbe yathākammūpagatañāṇaṃ dibbacakkhunti.

Yathākammūpagatañāṇaṃ dibbacakkhunti . āmantā . Āyasmā sārīputto yathākammūpagataṃ jānātīti . āmantā . hañci āyasmā sārīputto yathākammūpagataṃ jānāti no vata re vattabbe yathākammūpagatañāṇaṃ dibbacakkhunti.

Āyasmā sārīputto yathākammūpagataṃ jānātīti. Āmantā. Atthāyasmato sārīputtassa dibbacakkhunti. Na hevaṃ vattabbe .pe.

Atthāyasmato sārīputtassa dibbacakkhunti . Āmantā. Nanu āyasmā sārīputto etadavoca Neva pubbe nivāsāya napi dibbassa cakkhuno cetopariyāya iddhiyā sotadhātuvisuddhiyā cutiyā upapattiyā paṇidhi me na vijjatīti attheva suttantoti . āmantā . Tena hi na vattabbaṃ yathākammūpagatañāṇaṃ dibbacakkhunti. Yathākammūpagatañāṇakathā. ------