จักขุนทริยสนิทัสสนันติอาทิกถา

Cakkhundriyaṃ sanidassananti . āmantā . rūpaṃ rūpāyatanaṃ rūpadhātu .pe. cakkhussa āpāthaṃ āgacchatīti . na hevaṃ vattabbe .pe.

Cakkhundriyaṃ sanidassananti . āmantā . cakkhuñca paṭicca cakkhundriyañca uppajjati cakkhuviññāṇanti . na hevaṃ vattabbe .pe.

Cakkhuñca paṭicca cakkhundriyañca uppajjati cakkhuviññāṇanti . āmantā . cakkhuñca paṭicca cakkhundriyañca uppajjati cakkhuviññāṇanti attheva suttantoti . natthi . cakkhuñca paṭicca rūpe ca uppajjati cakkhuviññāṇanti attheva suttantoti . Āmantā . hañci cakkhuñca paṭicca rūpe ca uppajjati cakkhuviññāṇanti attheva suttanto no vata re vattabbe cakkhuñca paṭicca cakkhundriyañca uppajjati cakkhuviññāṇanti.

Na vattabbaṃ pañcindriyāni sanidassanānīti . Āmantā. Nanu passasi cakkhuṃ sotaṃ ghānaṃ jivhaṃ kāyanti . āmantā . Hañci passasi cakkhuṃ sotaṃ ghānaṃ jivhaṃ kāyaṃ tena vata re vattabbe pañcindriyāni sanidassanānīti .pe. Cakkhundriyaṃ sanidassanantiādikathā. --------