ทสพราหมณชาดก

๑๒. ทสพฺราหฺมณชาตกํ ฯ

ราชา อโวจ วิธูรนฺติ อิทํ สตฺถา เชตวเน วิหรนฺโต อสทิสทานํ อารพฺภ กเถสิ ฯ ตํ อฏฺฐนิปาเต วิธูรชาตเก วิตฺถาริตเมว ฯ

ราชา กิร ตํ ทานํ ททนฺโต สตฺถารํ เชฏฺฐกํ กตฺวา ปญฺจ ภิกฺขุสตานิ วิจินิตฺวา คณฺหิตฺวา มหาขีณาสวานญฺเญว อทาสิ ฯ อถสฺส ภิกฺขู คุณกถํ กเถนฺตา อาวุโส ราชา อสทิสทานํ เทนฺโต วิจินิตฺวา มคฺคผลฏฺฐาเน อทาสีติ ธมฺมสภายํ กถํ สมุฏฺฐาเปสุํ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมายนามาติ วุตฺเต อนจฺฉริยํ ภิกฺขเว ยํ โกสลราชา มาทิสสฺส พุทฺธสฺส อุปฏฺฐาโก หุตฺวา วิเจยฺย ทานํ เทติ โปราณกปณฺฑิตา อนุปฺปนฺเน พุทฺเธ วิเจยฺย ทานํ อทํสูติ วตฺวา เตหิ ยาจิโต อตีตํ อาหริ

อตีเต ภิกฺขเว กุรุรฏฺเฐ อินฺทปตฺตนคเร ยุธิฏฺฐิลโคตฺโต โกรพฺโย ราชา รชฺชํ กาเรสิ ฯ ตสฺส วิธูโรนาม อมจฺโจ อตฺถญฺจ ธมฺมญฺจ อนุสาสิ ฯ ราชา สกลชมฺพูทีปํ โขเภนฺโต มหาทานํ เทติ ฯ มนุสฺเสสุ ตํ คเหตฺวา ภุญฺชนฺเตสุ เอโกปิ ปญฺจสีลมตฺตํ รกฺขนฺโตนาม นตฺถิ สพฺเพ ทุสฺสีลาว ฯ ทานํ ราชานํ น โตเสติ ฯ ราชา วิเจยฺย ทานํ มหปฺผลนฺติ สีลวนฺตานํ ทาตุกาโม หุตฺวา จินฺเตสิ วิธูรปณฺฑิเตน สทฺธึ มนฺตยิสฺสามีติ ฯ โส ตํ อุปฏฺฐานํ อาคตํ อาสเน นิสีทาเปตฺวา ปญฺหํ ปุจฺฉิ ฯ

ตมตฺถํ ปกาเสนฺโต สตฺถา อุปฑฺฒคาถมาห

ราชา อโวจ วิธูรํ ธมฺมกาโม ยุธิฏฺฐิโลติ ฯ

ปุรโต รญฺโญ จ วิธูรสฺส จ วจนปฏิวจนํ อโหสิ ฯ

พฺราหฺมเณ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลํ ฯ

ทุลฺลภา พฺราหฺมณา เทว สีลวนฺโต พหุสฺสุตา

วิรตา เมถุนา ธมฺมา เย เต ภุญฺเชยฺยุ โภชนํ ฯ

ทส ขลุ มหาราช ยา ตา พฺราหฺมณชาติโย

เตสํ วิภงฺควิจยํ วิตฺถาเรน สุโณหิ เม ฯ

ปสิพฺพเก คเหตฺวาน ปุณฺเณ มูลสฺส สํวุเต

โอสธิกาเย คนฺเถนฺติ นฺหาปยนฺติ ชปนฺติ จ ฯ

ติกิจฺฉกสมา ราช เตปิ วุจฺจนฺติ พฺราหฺมณา

อกฺขาตา เต มหาราช ตาทิเส นิปตามเส ฯ

อเปตา เต จ พฺราหฺมญฺญา (อิติ ราชา จ โกรพฺโย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลํ ฯ

กิงฺกิณิโย คเหตฺวาน โฆเสนฺติ ปุรโตปิ เต

เปสนานิปิ คจฺฉนฺติ รถจริยาสุ สิกฺขเร

ปริจาริกสมา ราช เตปิ วุจฺจนฺติ พฺราหฺมณา

อกฺขาตา เต มหาราช ตาทิเส นิปตามเส ฯ

อเปตา เต จ พฺราหฺมญฺญา (อิติ ราชา จ โกรพฺโย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลํ ฯ

กมณฺฑลุํ คเหตฺวาน ปงฺกทณฺฑญฺจ พฺราหฺมณา

ปจฺจุเปสฺสนฺติ ราชาโน คาเมสุ นิคเมสุ จ

นาทินฺเน วุฏฺฐเหสฺสาม คามมฺหิ นิคมมฺหิ วา

นิคฺคาหกสมา ราช เตปิ วุจฺจนฺติ พฺราหฺมณา

อกฺขาตา เต มหาราช ตาทิเส นิปตามเส ฯ

อเปตา เต จ พฺราหฺมญฺญา (อิติ ราชา จ โกรพฺโย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลํ ฯ

ปรุฬฺหกจฺฉนขโลมา ปงฺกทนฺตา รชสฺสิรา

โอกิณฺณา รชชลฺเลหิ ยาจกา วิจรนฺติ เต

ขาณุฆาตสมา ราช เตปิ วุจฺจนฺติ พฺราหฺมณา

อกฺขาตา เต มหาราช ตาทิเส นิปตามเส ฯ

อเปตา เต จ พฺราหฺมญฺญา (อิติ ราชา จ โกรพฺโย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลํ ฯ

หรีตกํ อามลกํ อมฺพํ ชมฺพุํ วิเภทกํ

ลพุชํ ทนฺตโปณานิ เวฬุวา พทรานิ จ

ราชายตนํ อุจฺฉุปูฏํ ธูมเนตฺตํ มธุอญฺชนํ

อุจฺจาวจานิ ปณียานิ วิปเณนฺติ ชนาธิป

วาณิชกสมา ราช เตปิ วุจฺจนฺติ พฺราหฺมณา

อกฺขาตา เต มหาราช ตาทิเส นิปตามเส ฯ

อเปตา เต จ พฺราหฺมญฺญา (อิติ ราชา จ โกรพฺโย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลํ ฯ

กสิวาณิชฺชํ กาเรนฺติ โปสยนฺติ อเชฬเก

กุมาริโย ปเวจฺฉนฺติ วิวาหนฺตาวาหนฺติ จ

สมา อมฺพฏฺฐเวเสหิ เตปิ วุจฺจนฺติ พฺราหฺมณา

อกฺขาตา เต มหาราช ตาทิเส นิปตามเส ฯ

อเปตา เต จ พฺราหฺมญฺญา (อิติ ราชา จ โกรพฺโย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลํ ฯ

นิกฺขิตฺตภิกฺขํ ภุญฺชนฺติ คาเมสุ เต ปุโรหิตา

พหู เน ปริปุจฺฉนฺติ อณฺฑจฺเฉทานิ ลญฺจกา

ปสูปิ ตตฺถ หญฺญนฺติ มหิสา สุกรา อชา

โคฆาตกสมา ราช เตปิ วุจฺจนฺติ พฺราหฺมณา

อกฺขาตา เต มหาราช ตาทิเส นิปตามเส ฯ

อเปตา เต จ พฺราหฺมญฺญา (อิติ ราชา จ โกรพฺโย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลํ ฯ

อสิจมฺมํ คเหตฺวาน ขคฺคํ ปคฺคยฺห พฺราหฺมณา

เวสฺสปเถสุ ติฏฺฐนฺติ สตฺถํ อมฺพาหยนฺติปิ

สมา โคปนิสาเทหิ เตปิ วุจฺจนฺติ พฺราหฺมณา

อกฺขาตา เต มหาราช ตาทิเส นิปตามเส ฯ

อเปตา เต จ พฺราหฺมญฺญา (อิติ ราชา จ โกรพฺโย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลํ ฯ

อรญฺเญ กุฏิกํ กตฺวา กูฏานิ การยนฺติ เต

สสํ วิฬารํ พาเธนฺติ อาโคธา มจฺฉกจฺฉปํ

เต ลุทฺทกสมา ราช เตปิ วุจฺจนฺติ พฺราหฺมณา

อกฺขาตา เต มหาราช ตาทิเส นิปตามเส ฯ

อเปตา เต จ พฺราหฺมญฺญา (อิติ ราชา จ โกรพฺโย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลํ ฯ

อญฺเญ ธนสฺส กามาหิ เหฏฺฐา มญฺเจ ปสกฺขิตา

ราชาโน อุปริ นฺหาเปนฺติ โสมยาเค อุปฏฺฐิเต

มลมชฺชสมา ราช เตปิ วุจฺจนฺติ พฺราหฺมณา

อกฺขาตา เต มหาราช ตาทิเส นิปตามเส ฯ

อเปตา เต จ พฺราหฺมญฺญา (อิติ ราชา จ โกรพฺโย)

น เต วุจฺจนฺติ พฺราหฺมณา

อญฺเญ วิธูร ปริเยส สีลวนฺเต พหุสฺสุเต

วิรเต เมถุนา ธมฺมา เย เม ภุญฺเชยฺยุ โภชนํ

ทกฺขิณํ สมฺม ทสฺสามิ ยตฺถ ทินฺนํ มหปฺผลนฺติ ฯ

ตตฺถ สีลวนฺเตติ มคฺเคนาคตสีเล ฯ พหุสฺสุเตติ ปฏิเวธพหุสฺสุเต ฯ ทกฺขิณนฺติ ทานํ ฯ เยติ เย ธมฺมิกสมณพฺราหฺมณา ตํ ทานํ ภุญฺเชยฺยุํ เต ทุลฺลภา ฯ พฺราหฺมณชาติโยติ พฺราหฺมณกุลานิ ฯ เตสํ วิภงฺควิจยนฺติ เตสํ พฺราหฺมณานํ วิภาคํ มม ปญฺญาย วิจิตภาวํ วิตฺถาเรน สุณาหิ ฯ สํวุเตติ พนฺธมุเข ฯ โอสธิกาเย คนฺเถนฺตีติ อิทํ อิมสฺส โรคสฺส เภสชฺชํ อิทํ อิมสฺสาติ เอวํ สิโลเก พนฺธิตฺวา มนุสฺสานํ เทนฺติ ฯ นฺหาปยนฺตีติ นฺหาปนํนาม กโรนฺติ ฯ ชปนฺติ จาติ ภูตวิชฺชํ ปริวตฺเตนฺติ ฯ ติกิจฺฉกสมาติ เวชฺชสทิสา ฯ เตปิ วุจฺจนฺตีติ เตปิ พฺราหฺมณา วา มยํ อพฺราหฺมณา วาติ อชานิตฺวาว เวชฺชกมฺเมน ชีวิตํ กปฺเปนฺตา โวหาเรน พฺราหฺมณาติ วุจฺจนฺติ ฯ อกฺขาตา เตติ อิเม เต มยา เวชฺชพฺราหฺมณานาม อกฺขาตา ฯ นิปตามเสติ เวเทหิ ตาทิเส พฺราหฺมเณ นิมนฺตนตฺถาย อุปสงฺกมาม อตฺถิ เต เอเตหิ อตฺโถติ ปุจฺฉิ ฯ พฺราหฺมญฺญาติ พฺราหฺมณธมฺโม ฯ น เต วุจฺจนฺตีติ เต วาหิตปาปตาย พฺราหฺมณานาม น วุจฺจนฺติ ฯ กิงฺกิณิโยติ มหาราช อปเรปิ พฺราหฺมณา อตฺตโน พฺราหฺมณธมฺมํ ฉฑฺเฑตฺวา ชีวิกตฺถาย ราชราชมหามตฺตานํ ปุรโต กํสตาเล คเหตฺวา วาเทนฺตา คายนฺตา คจฺฉนฺติ ฯ เปสนานิปีติ ทาสกมฺมกราวิย เปสนานิปิ คจฺฉนฺติ ฯ รถจริยาสูติ รถสิปฺปํ สิกฺขนฺติ ฯ ปริจาริกสมาติ ทาสกมฺมกรสทิสา ฯ ปงฺกทณฺฑนฺติ ทนฺตกฏฺฐํ ฯ ปจฺจุเปสฺสนฺติ ราชาโนติ อปเรปิ พฺราหฺมณา ราชราชมหามตฺเต ปฏิจฺจ อาคมฺม สนฺธาย อุปเสวนฺติ ฯ คาเมสุ นิคเมสุ จาติ เตสํ นิเวสนทฺวาเร นิสีทนฺติ ฯ นิคฺคาหกสมาติ นิคฺคาหการเกหิ พลิสาธกราชปุริเสหิ สมา ยถา เต ปุริสา อคเหตฺวา น คมิสฺสามาติ นิคฺคหํ กตฺวา คณฺหนฺติเยว ตถา คาเม วา วเน วา อลทฺเธ มยํ มรนฺตาปิ น อุฏฺฐหิสฺสามาติ อุปวสนฺติ ฯ เตปีติ เตปิ พลิสาธกสทิสา ปาปธมฺมา ฯ รชชลฺเลหีติ รเชหิ จ ปํสูหิ จ โอกิณฺณา ฯ ยาจกาติ ธนยาจกา ขาณุฆาตสมาติ มลินสรีรตาย ฌามเขตฺเต ขาณุฆาตเกหิ ภูมึ ขณิตฺวา ฌามขาณุกอุทฺธรณมนุสฺเสหิ สมา อคเหตฺวา น คมิสฺสามาติ นิจฺจลภาเวน ฐิตตฺตา นิกฺขณิตฺวา ฐปิตขาณุกาวิยาติ อตฺโถ ฯ เตปีติ เตปิ ตถา ลทฺธํ ธนํ วฑฺฒิยา ปโยเชตฺวา ปุน ตถา วิจรนฺตา ทุสฺสีลา พฺราหฺมณา ฯ อุจฺฉุปูฏนฺติ อุจฺฉุญฺเจว ผาณิตปูฏญฺจ ฯ มธุอญฺชนนฺติ มธุญฺเจว อญฺชนญฺจ ฯ อุจฺจาวจานีติ อปฺปคฺฆมหคฺฆานิ ฯ ปณิยานีติ ภณฺฑานิ ฯ วิปเณนฺตีติ กีณนฺติ วิกีณนฺติ ฯ เตปีติ เตปิ อิมานิ เอตฺตกานิ วิกีณิตฺวา ชีวิตกปฺปกา วาณิชกพฺราหฺมณา ฯ โปสยนฺตีติ กยวิกเยน ชีวิตกปฺปนตฺถํ โปเสนฺตีติ ฯ ปเวจฺฉนฺตีติ อตฺตโน ธีตโร หิรญฺญสุวณฺณํ คเหตฺวา ปเรสํ เทนฺติ เต เอวํ ปเรสํ ททมานา วิวาหนฺติ อตฺตโน ปุตฺตานํ อตฺถาย คณฺหมานา อาวาหนฺติ นาม ฯ อมฺพฏฺฐเวเสหีติ กุฏุมฺพิเกหิ เจว คหปตีหิ จ สมา เตปิ โวหารวเสน พฺราหฺมณาติ วุจฺจนฺติ ฯ นิกฺขิตฺตภิกฺขนฺติ คามปุโรหิตา หุตฺวา อตฺตโน อตฺถาย นิมนฺตภิกฺขํ ฯ พหู เนติ พหู ชนา เต คามปุโรหิเต นกฺขตฺตมุหุตฺตมงฺคลานิ ปุจฺฉนฺติ ฯ อณฺฑจฺเฉทานิ ลญฺจกาติ ภตึ คเหตฺวา พลิพทฺธาทีนํ อณฺฑจฺเฉทกา เจว ติสูลาทิองฺคกรเณน ลญฺจกา จ ลกฺขณการกาติ อตฺโถ ฯ ตตฺถาติ เตสํ คามปุโรหิตานํ เคเหสุ มํสวิกีณนตฺถํ เอเต ปสุอาทโยปิ หญฺญนฺติ ฯ เตปีติ เตปิ โคฆาตกสมา พฺราหฺมณาติ วุจฺจนฺติ ฯ อสิจมฺมนฺติ อสิญฺเจว จมฺมกณฺฑวารณญฺจ ฯ เวสฺสปเถสูติ วาณิชานํ คมนมคฺเคสุ ฯ อมฺพาหยนฺตีติ สตฺถวาหานํ หตฺถโต สตมฺปิ สหสฺสมฺปิ คเหตฺวา สตฺถํ โจรา อฏวึ อาวหนฺติ ฯ โคปนิสาเทหีติ โคปาลเกหิ เจว เนสาเทหิ จ คามฆาตกโจเรหิ สมาติ วุจฺจนฺติ ฯ เตปีติ เตปิ เอวรูปา พฺราหฺมณาติ วุจฺจนฺติ ฯ กูฏานิ การยนฺติ เตติ กูฏปาสาทีนิ โรเปนฺติ ฯ สสํ วิฬารนฺติ สสญฺจ พิฬาเร จ เอเตน ถลจเร มิเค ทสฺเสติ ฯ อาโคธา มจฺฉกจฺฉปนฺติ ถลเชสุ ตาว อาโคธโตว มหนฺเต จ ขุทฺทเก จ ปาณิโน พาเธนฺติ มาเรนฺติ ชลเชสุ มจฺฉกจฺฉเป ฯ เตปีติ เตปิ ลุทฺทกสมา พฺราหฺมณาติ วุจฺจนฺติ ฯ อญฺเญ ธนสฺส กามาหีติ อปเร พฺราหฺมณา ธนํ ปฏฺเฐนฺตา ฯ เหฏฺฐา มญฺเจ ปสกฺขิตาติ กลิปวาหนกมฺมํ กาเรสฺสามาติ รตนมยํ มญฺจํ กาเรตฺวา ตสฺส เหฏฺฐา นิปนฺนา อจฺฉนฺติ อถ เนสํ โสมยาเค อุปฏฺฐิเต ราชาโน อุปริ นฺหายนฺติ เต กิร โสมยาเค นิฏฺฐิเต อาคนฺตฺวา ตสฺมึ มญฺเจ นิสีทนฺติ อถ เน อญฺเญ พฺราหฺมณา กลึ ปวาเหสฺสามาติ นฺหาเปนฺติ รตนมญฺโจ จ รญฺโญ ราชาลงฺกาโร จ สพฺโพ เหฏฺฐา นิปนฺนสฺเสว โหติ ฯ เตปีติ เตปิ มลมชฺชเนหิ นฺหาปิเตหิ สทิสา พฺราหฺมณาติ วุจฺจนฺติ ฯ

เอวมฺปิเม โวหารมตฺเต พฺราหฺมเณ ทสฺเสตฺวา อิทานิ ปรมตฺถพฺราหฺมเณ ทสฺเสนฺโต เทฺว คาถา อภาสิ

อตฺถิ โข พฺราหฺมณา เทว สีลวนฺโต พหุสฺสุตา

วิรตา เมถุนา ธมฺมา เย เต ภุญฺเชยฺยุ โภชนํ ฯ

เอกจฺเจ ภตฺตํ ภุญฺชนฺติ น จ มชฺชํ ปิวนฺติ เต

อกฺขาตา เต มหาราช ตาทิเส นิปตามเสติ ฯ

ตตฺถ สีลวนฺโตติ อริยสีเลน สมนฺนาคตา ฯ พหุสฺสุตาติ ปฏิเวธพาหุสจฺเจน สมนฺนาคตา ฯ ตาทิเสติ เอวรูเป พาหิตปาเป ปจฺเจกพุทฺธพฺราหฺมเณ นิมนฺตนตฺถาย อุปสงฺกมามาติ ฯ

ราชา ตสฺส กถํ สุตฺวา ปุจฺฉิ สมฺม วิธูร เอวรูปา อคฺคทกฺขิเณยฺยา พฺราหฺมณา กหํ วสนฺตีติ ฯ อุตฺตรหิมวนฺเต นนฺทมูลกปพฺภาเร มหาราชาติ ฯ เตนหิ ปณฺฑิต ตว พเลน มยฺหํ เต พฺราหฺมเณ ปริเยสาติ ตุฏฺฐมานโส คาถมาห

เอเต โข พฺราหฺมณา วิธูร สีลวนฺโต พหุสฺสุตา

เอเต วิธูร ปริเยส ขิปฺปญฺจ เน นิมนฺตยาติ ฯ

มหาสตฺโต สาธูติ ตสฺส วจนํ สมฺปฏิจฺฉิตฺวา เตนหิ มหาราช นครํ อลงฺกริตฺวา สพฺเพ นครวาสิโน ทานํ ทตฺวา อุโปสถํ อธิฏฺฐาย สมาทินฺนสีลา โหนฺตูติ เภริญฺจาราเปตฺวา ตุมฺเหปิ สทฺธึ ปริสชเนน อุโปสถํ สมาทิยาถาติ วตฺวา สยํ ปาโตว ภุญฺชิตฺวา อุโปสถํ สมาทาย สายณฺหสมเย ชาติปุปฺผปุณฺณสุวณฺณสมุคฺคํ อาหราเปตฺวา รญฺญา สทฺธึ ปญฺจปติฏฺฐิตํ ปติฏฺฐเปตฺวา ปจฺเจกพุทฺธานํ คุเณ อนุสฺสริตฺวา วนฺทิตฺวา อุตฺตรหิมวนฺเต นนฺทมูลกปพฺภารวาสิโน ปญฺจสตา ปจฺเจกพุทฺธา เสฺว อมฺหากํ ภิกฺขํ คณฺหนฺตูติ นิมนฺเตตฺวา อากาเส อฏฺฐ ปุปฺผมุฏฺฐิโย วิสชฺเชสิ ฯ ตทา ตตฺถ ปญฺจสตา ปจฺเจกพุทฺธา วสนฺติ ฯ ปุปฺผานิ คนฺตฺวา เตสํ ปจฺเจกพุทฺธานํ สนฺติเก อุปริ ปตึสุ ฯ เต อาวชฺเชนฺตา ตํ การณํ ญตฺวา มาริสา วิธูรปณฺฑิเตน นิมนฺติตมฺหา น โข ปเนส อิตรสตฺโต พุทฺธงฺกุโร เอส อิมสฺมิญฺเญว กปฺเป พุทฺโธ ภวิสฺสติ กริสฺสามสฺส สงฺคหนฺติ นิมนฺตนํ อธิวาสยึสุ ฯ มหาสตฺโต ปุปฺผานํ อนาคตสญฺญาย อธิวาสิตภาวํ ญตฺวา มหาราช ปจฺเจกพุทฺธา อาคมิสฺสนฺติ สกฺการสมฺมานํ กโรหีติ อาห ฯ ราชา ปุนทิวเส มหาสกฺการํ กตฺวา มหาตเล มหารหานิ อาสนานิ ปญฺญาเปสิ ฯ ปจฺเจกพุทฺธาปิ อโนตตฺตทเห กตสรีรปฏิชคฺคนา เวลํ สลฺลกฺเขตฺวา อากาเสนาคนฺตฺวา ราชงฺคเณ โอตรึสุ ฯ ราชา จ โพธิสตฺโต จ ปสนฺนมานสา เตสํ หตฺถโต ปตฺเต คเหตฺวา ปาสาทํ อาโรเปตฺวา นิสีทาเปตฺวา ทกฺขิโณทกํ ทตฺวา ปณีเตน ขาทนีเยน โภชนีเยน ปริวีสึสุ เตสํ ภตฺตกิจฺจปริโยสาเน ปุนทิวสตฺถายาติ เอวํ สตฺตเม ทิวเส นิมนฺเตตฺวา มหาทานํ ทตฺวา สตฺตเม ทิวเส สพฺพปริกฺขาเร อทํสุ ฯ เต อนุโมทนํ กตฺวา อากาเสน ตตฺเถว คตา ฯ ปริกฺขาราปิ เตเหว สทฺธึเยว คตา ฯ

สตฺถา อิมํ ธมฺมเทสนํ อาหริตฺวา อนจฺฉริยํ ภิกฺขเว โกสลรญฺโญ มม อุปฏฺฐากสฺส สโต วิเจยฺยทานํ ทาตุํ โปราณกปณฺฑิตา อนุปฺปนฺเนปิ พุทฺเธ ทานํ อทํสุเยวาติ วตฺวา ชาตกํ สโมธาเนสิ ตทา ราชา อานนฺโท อโหสิ ปจฺเจกพุทฺธา ปรินิพฺพุตา วิธูรปณฺฑิโต ปน อหเมวาติ ฯ

ทสพฺราหฺมณชาตกํ ทฺวาทสมํ ฯ