สิกขาบทวิภังค์

Yo panāti yo yādiso .pe. eso vuccati yo panāti . bhikkhūti .pe. ayaṃ imasmiṃ atthe adhippeto bhikkhūti . Gāmo nāma ekakuṭikopi gāmo dvikuṭikopi gāmo tikuṭikopi gāmo catukkuṭikopi gāmo samanussopi gāmo amanussopi gāmo parikkhittopi gāmo aparikkhittopi gāmo gonisādiniviṭṭhopi gāmo yopi sattho atirekacatummāsaniviṭṭho sopi vuccati gāmo. Gāmūpacāro nāma parikkhittassa gāmassa indakhīle ṭhitassa majjhimassa purisassa leḍḍupāto 1- aparikkhittassa gāmassa gharūpacāre ṭhitassa majjhimassa purisassa leḍḍupāto . araññaṃ nāma ṭhapetvā gāmañca gāmūpacārañca avasesaṃ araññaṃ nāma . adinnaṃ nāma yaṃ adinnaṃ anissaṭṭhaṃ aparicattaṃ rakkhitaṃ gopitaṃ mamāyitaṃ parapariggahitaṃ etaṃ adinnaṃ nāma. Theyyasaṅkhātanti theyyacitto avaharaṇacitto.

Ādiyeyyāti ādiyeyya hareyya avahareyya ariyāpathaṃ vikopeyya ṭhānā cāveyya saṅketaṃ vītināmeyya.

Yathārūpaṃ nāma pādaṃ vā pādārahaṃ vā atirekapādaṃ vā . rājāno nāma paṭhabyā rājā padesarājā maṇḍalikā @Footnote: 1 leṇḍupātotipi pāṭho. Antarabhogikā akkhadassā mahāmattā ye vā pana chejjabhejjaṃ anusāsanti ete rājāno nāma . coro nāma yo pañcamāsakaṃ vā atirekapañcamāsakaṃ vā agghanakaṃ adinnaṃ theyyasaṅkhātaṃ ādiyati eso coro nāma . haneyyuṃ vāti hatthena vā pādena vā kasāya vā vettena vā addhadaṇḍakena vā chejjāya vā haneyyuṃ . bandheyyuṃ vāti rajjubandhanena vā andubandhanena vā saṅkhalikabandhanena vā gharabandhanena vā nagarabandhanena vā gāmabandhanena vā nigamabandhanena vā bandheyyuṃ purisaguttiṃ vā kareyyuṃ . pabbājeyyuṃ vāti gāmā vā nigamā vā nagarā vā janapadā vā janapadapadesā vā pabbājeyyuṃ. Corosi bālosi mūḷhosi thenosīti paribhāso eso.

Tathārūpaṃ nāma pādaṃ vā pādārahaṃ vā atirekapādaṃ vā . ādiyamānoti ādiyamāno haramāno avaharamāno iriyāpathaṃ vikopayamāno ṭhānā cāvayamāno saṅketaṃ vītināmayamāno.

Ayampīti purimaṃ upādāya vuccati. Pārājiko hotīti seyyathāpi nāma paṇḍupalāso bandhanā pavutto 1- abhabbo haritattāya evameva bhikkhu pādaṃ vā pādārahaṃ vā atirekapādaṃ vā adinnaṃ theyyasaṅkhātaṃ ādiyitvā assamaṇo hoti asakyaputtiyo tena vuccati pārājiko hotīti . asaṃvāsoti saṃvāso nāma ekakammaṃ @Footnote: 1 pamuttotipi pāṭho. Ekuddeso samasikkhātā eso saṃvāso nāma so tena saddhiṃ natthi tena vuccati asaṃvāsoti.