เรื่องภิกษุผู้ประพฤติตามพระเทวทัตต์

{417-418} Tena samayena buddho bhagavāti dutiyasaṅghabhedasikkhāpadaṃ. Tattha anuvattakāti tassa diṭṭhikhantiruciggahaṇena anupaṭipajjanakā. Vaggaṃ asāmaggīpakkhiyavacanaṃ vadantīti vaggavādakā. Padabhājane pana tassa vaṇṇanāya pakkhāya ṭhitā hontīti vuttaṃ. Tassa saṅghabhedāya parakkamantassa vaṇṇanatthāya ca pakkhavuḍḍhiatthāya ca ṭhitāti attho. Yehi vaggavādakā te niyamena īdisā honti tasmā etaṃ vuttaṃ. Yasmā pana tiṇṇaṃ uddhaṃ kammārahā na honti na hi saṅgho saṅghassa kammaṃ karoti tasmā eko vā dve vā tayo vāti vuttaṃ. Jānāti noti amhākaṃ chandādīnipi jānāti. Bhāsatīti evaṃ karomāti amhehi saddhiṃ bhāsati. Amhākaṃpetaṃ Khamatīti yaṃ so karoti etaṃ amhākaṃpi ruccati. Sametāyasmantānaṃ saṅghenāti āyasmantānaṃ cittaṃ saṅghena saddhiṃ sametu samāgacchatu ekībhāvaṃ yātūti vuttaṃ hoti. Sesamettha paṭhamasikkhāpade vuttanayattā uttānatthattā ca pākaṭameva. Samuṭṭhānādīnipi paṭhamasikkhāpadasadisānevāti.

Dutiyasaṅghabhedasikkhāpadavaṇṇanā niṭṭhitā.