๓. ปริพฺพาชกวคฺค

๑. จูฬวจฺฉโคตฺตสุตฺตวณฺณนา ๑-

[๑๘๕] เอวมฺเม สุตนฺติ จูฬวจฺฉโคตฺตสุตฺตํ. ตตฺถ เอกปุณฺฑรีเกติ ปุณฺฑรีโก วุจฺจติ เสตมฺพรุกฺโข, โส ตสฺมึ อาราเม เอโก ปุณฺฑรีโก อตฺถีติ เอกปุณฺฑรีโก. เอตทโหสีติ ตตฺถ ปวิสิตุกามตาย อโหสิ. จิรสฺสํ โข ภนฺเตติ ปกติยา อาคตปุพฺพตํ อุปาทาย. ธมฺมสฺส จานุธมฺมนฺติ อิธ สพฺพญฺญุตญาณํ ธมฺโม นาม, มหาชนสฺส พฺยากรณํ อนุธมฺโม นาม. เสสํ ชีวกสุตฺเต ๒- วุตฺตนยเมว. น เมติ อนนุญฺญาย ฐตฺวา อนุญฺญํปิ ปฏิกฺขิปติ. "สพฺพญฺญู สพฺพทสฺสาวี อปริเสสํ ญาณทสฺสนํ ปฏิชานาตี"ติ หิ อิทํ อนุชานิตพฺพํ สิยา, "จรโต จ เม ฯเปฯ ปจฺจุปฏฺฐิตนฺ"ติ อิทํ ปน นานุชานิตพฺพํ. สพฺพญฺญุตญาเณน หิ อาวชฺชิตฺวาว ชานาติ. ตสฺมา อนนุญฺญาย ฐตฺวา อนุญฺญํปิ ปฏิกฺขิปนฺโต เอวมาห.

[๑๘๖] อาสวานํ ขยาติ เอตฺถ สกึ ขีณานิ อาสวานํ ปุน เขเปตพฺพาภาวา ยาวเทวาติ น วุตฺตํ. ปุพฺเพนิวาสญาเณน เจตฺถ ภควา อตีตชานนคุณํ ทสฺเสติ, ทิพฺพจกฺขุญาเณน ปจฺจุปฺปนฺนชานนคุณํ, อาสวกฺขยญาเณน โลกุตฺตรคุณนฺติ. อิติ อิมาหิ ตีหิ วิชฺชาหิ สกลพุทฺธคุเณ สงฺขิปิตฺวา กเถสิ.