๘. พาหิติกสุตฺตวณฺณนา

[๓๕๘] เอวมฺเม สุตนฺติ พาหิติกสุตฺตํ. ตตฺถ เอกปุณฺฑรีกํ นาคนฺติ เอวํนามกํ หตฺถึ. ตสฺส กิร ผาสุกานํ อุปริ ตาลผลมตฺตํ ปณฺฑรฏฺฐานํ อตฺถิ, เตนสฺส เอกปุณฺฑรีโกติ นามํ อกํสุ. สิริวฑฺฒํ มหามตฺตนฺติ ปจฺเจกหตฺถึ อภิรุหิตฺวา กถาผาสุกตฺถํ สทฺธึ คจฺฉนฺตํ เอวํนามกํ มหามตฺตํ. อายสฺมา โนติ เอตฺถ โนติ ปุจฺฉาย นิปาโต. มหามตฺโต เถรสฺส สงฺฆาฏิปตฺตธารณาการํ สลฺลกฺเขตฺวา "เอวํ มหาราชา"ติ อาห.

[๓๕๙] โอปารมฺโภติ ๒- โอปารมฺภํ โทสํ อาโรปนารโห. กึ ปุจฺฉามีติ ราชา ปุจฺฉติ. สุนฺทริวตฺถุสฺมึ อุปฺปนฺนมิทํ สุตฺตนฺตํ ปุจฺฉามีติ ปุจฺฉติ. ยญฺหิ มยํ ภนฺเตติ ภนฺเต ยํ มยํ วิญฺญูหีติ อิทํ ปทํ คเหตฺวา ปเญฺหน ปริปูเรตุํ นาสกฺขิมฺหา. ตํ การณํ อายสฺมตา เอวํ วทนฺเตน ปริปูริตุํ.

[๓๖๐] อกุสโลติ อโกสลฺลสมฺภูโต. สาวชฺโชติ สโทโส. สพฺยาปชฺโฌติ ๓- สทุกฺโข. ทุกฺขวิปาโกติ อิธ นิสฺสนฺทวิปาโก กถิโต. ตสฺสาติ ตสฺส เอวํ อตฺตพฺยาพาธาทีนํ อตฺถาย ปวตฺตกายสมาจารสฺส.