๕. มารธีตุสุตฺตวณฺณนา

[๑๖๑] ปญฺจเม อภาสิตฺวาติ เอตฺถ อกาโร นิปาตมตฺตํ, ภาสิตฺวาติ อตฺโถ. อภาสยิตฺวาติปิ ปาโฐ. อุปสงฺกมึสูติ "โคปาลทารกํ วิย ทณฺฑเกน ภูมิยํ วิเลขนฺตํ ๑- ทิสฺวา อติวิย ทุมฺมโน หุตฺวา นิสินฺโน, `กินฺนุ โข การณนฺ'ติ ปุจฺฉิตฺวา ชานิสฺสามา"ติ อุปสงฺกมึสุ.

โสจสีติ จินฺเตสิ. อรญฺญมิว กุญฺชรนฺติ ยถา อรญฺญโต เปสิตคณิการหตฺถินิโย ๒- อรญฺญิกํ ๓- กุญฺชรํ อิตฺถีกุตฺตทสฺสเนน ปโลเภตฺวา พนฺธิตฺวา อานยนฺติ, เอวํ อานยิสฺสาม. มารเธยฺยนฺติ เตภูมิกวฏฺฏํ. ๔-

อุปสงฺกมึสูติ "ตุเมฺห โถกํ อธิวาเสถ, มยํ ตํ อาเนสฺสามา"ติ ปิตรํ สมสฺสาเสตฺวา อุปสงฺกมึสุ. อุจฺจาวจาติ นานาวิธา. เอกสตํ เอกสตนฺติ เอเกกํ สตํ สตํ กตฺวา. กุมาริวณฺณสตนฺติ อิมินา นเยน กุมาริอตฺตภาวานํ สตํ.