๒. เทวปุตฺตสํยุตฺต

๑. ปฐมวคฺค

๑. ปฐมกสฺสปสุตฺตวณฺณนา

[๘๒] เทวปุตฺตสํยุตฺตสฺส ปฐเม เทวปุตฺโตติ เทวานํ หิ องฺเก นิพฺพตฺตา ปุริสา เทวปุตฺตา นาม, อิตฺถิโย เทวธีตโร นาม โหนฺติ. นามวเสน อปากฏาว "อญฺญตรา เทวตา"ติ วุจฺจติ, ปากโฏ "อิตฺถนฺนาโม เทวปุตฺโต"ติ. ตสฺมา เหฏฺฐา "อญฺญตรา เทวตา"ติ วตฺวา อิธ "เทวปุตฺโต"ติ วุตฺตํ. อนุสาสนฺติ อนุสิฏฺฐึ. อยํ กิร เทวปุตฺโต ภควตา สมฺโพธิโต สตฺตเม วสฺเส ยมกปาฏิหาริยํ กตฺวา ติทสปุเร วสฺสํ อุปคมฺม อภิธมฺมํ เทเสนฺเตน ฌานวิภงฺเค "ภิกฺขูติ สมญฺญาย ภิกฺขุ, ปฏิญฺญาย ภิกฺขู"ติ ๑- เอวํ ภิกฺขุนิทฺเทสํ กถิยมานํ อสฺโสสิ. "เอวํ วิตกฺเกถ, มา เอวํ วิตกฺกยิตฺถ, เอวํ มนสิกโรถ, มา เอวํ มนสากตฺถ, อิทํ ปชหถ, อิทํ อุปสมฺปชฺช วิหรถา"ติ ๒- เอวรูปํ ปน ภิกฺขุโอวาทํ ภิกฺขุอนุสาสนํ น อสฺโสสิ. โส ตํ สนฺธาย "ภิกฺขุํ ภควา ปกาเสสิ, โน จ ภิกฺขุโน อนุสาสนฺ"ติ อาห.