วิชฺชา อุปฺปตตํ เสฏฺฐาติ ปุริมปเญฺห กิร สุตฺวา สมีเป ฐิตา เอกา เทวตา "เทวเต กสฺมา ตฺวํ เอตํ ปญฺหํ ทสพลํ ปุจฺฉสิ, อหํ เต กเถสฺสามี"ติ อตฺตโน ลทฺธิยา ๑- ปญฺหํ กเถสิ. อถ นํ อิตรา เทวตา อาห "ยาว ธํสี ๒- เทวเต ยาว ปคพฺภมุขรา, อหํ พุทฺธํ ภควนฺตํ ปุจฺฉามิ, ตฺวํ มยฺหํ กสฺมา กเถสี"ติ นิวตฺติตฺวา ๓- ตเมว ปญฺหํ ทสพลํ ปุจฺฉิ. อถสฺสา สตฺถา วิสชฺเชนฺโต วิชฺชา อุปฺปตตนฺติอาทิมาห. ตตฺถ วิชฺชาติ จตุมคฺควิชฺชา. สา หิ อุปฺปชฺชมานา ๔- สพฺพากุสลธมฺเม สมุคฺฆาเฏติ. ตสฺมา "อุปฺปตตํ เสฏฺฐา"ติ วุตฺตา. อวิชฺชาติ วฏฺฏมูลกมหาอวิชฺชา. สา หิ นิปตนฺตานํ โอสีทนฺตานํ วรา. ปวชฺชมานานนฺติ ๕- ปทสา จรมานานํ ชงฺคมมานานํ ๖- อโนมปุญฺญกฺเขตฺตภูโต สํโฆ วโร. ตญฺหิ ตตฺถ ตตฺถ ทิสฺวา ปสนฺนจิตฺตา สตฺตา โสตฺถึ ปาปุณนฺติ. พุทฺโธติ ปุตฺโต โหตุ ๗- อญฺโญ วา, เยสํ เกสญฺจิ วทมานานํ พุทฺโธ วโร. ตสฺส หิ ธมฺมเทสนํ อาคมฺม อเนกสตสหสฺสานํ ปาณานํ พนฺธนโมกฺโข โหตีติ. จตุตฺถํ.