อฑฺฒาติ อิสฺสรา. นิธานคตสฺส ๑- มหนฺตตาย มหทฺธนา. สุวณฺณรชตภาชนาทีนํ อุปโภคภณฺฑานํ มหนฺตตาย มหาโภคา. อนิธานคตสฺส ชาตรูปรชตสฺส ปหูตตาย ปหูตชาตรูปรชตา. วิตฺตูปกรณสฺส ตุฏฺฐิการณสฺส ๒- ปหูตตาย ปหูตวิตฺตูปกรณา. โคธนาทีนญฺจ สตฺตวิธธญฺญานญฺจ ปหูตตาย ปหูตธนธญฺญา. เตสมฺปิ ชาตานํ นตฺถิ อญฺญตฺร ชรามรณาติ เตสมฺปิ เอวํ อิสฺสรานํ ชาตานํ นิพฺพตฺตานํ นตฺถิ อญฺญตฺร ชรามรณา, ชาตตฺตาเยว ชรามรณโต โมกฺโข นาม นตฺถิ, อนฺโตชรามรเณเยว เตติ. ๓-

อรหนฺโตติอาทีสุ อารกา กิเลเสหีติ อรหนฺโต. ขีณา เอเตสํ จตฺตาโร อาสวาติ ขีณาสวา. พฺรหฺมจริยวาสํ วุตฺถา ปรินิฏฺฐิตวาสาติ วุสิตวนฺโต. จตูหิ มคฺเคหิ กรณียํ เอเตสํ กตนฺติ กตกรณียา. ขนฺธภาโร กิเลสภาโร อภิสงฺขารภาโร กามคุณภาโรติ อิเม โอหิตา ภารา เอเตสนฺติ โอหิตภารา. อนุปฺปตฺโต อรหตฺตสงฺขาโต สโก อตฺโถ เอเตสนฺติ อนุปฺปตฺตสทตฺถา. ทสวิธมฺปิ ปริกฺขีณํ ภวสํโยชนํ เอเตสนฺติ ปริกฺขีณภวสํโยชนา. สมฺมา การเณน ๔- ชานิตฺวา วิมุตฺตาติ สมฺมทญฺญาวิมุตฺตา. มคฺคปญฺญาย จตุสจฺจธมฺมํ ญตฺวา ผลวิมุตฺติยา วิมุตฺตาติ อตฺโถ. เภทนธมฺโมติ ภิชฺชนสภาโว. นิกฺเขปนธมฺโมติ นิกฺขิปิตพฺพสภาโว. ขีณาสวสฺส หิ อชีรณธมฺโมปิ อตฺถิ, อารมฺมณโต ปฏิวิทฺธนิพฺพานํ, ตํ หิ ๕- น ชีรติ. อิธ ปนสฺส ชีรณธมฺมํ ทสฺเสนฺโต เอวมาห. อตฺถุปฺปตฺติโก กิรสฺส สุตฺตสฺส นิกฺเขโป. สีวิกสาลาย นิสีทิตฺวา กถิตนฺติ วทนฺติ. ตตฺถ ภควา จิตฺรานิ รถยานาทีนิ ทิสฺวา ทิฏฺฐเมว อุปมํ กตฺวา "ชีรนฺติ เว ราชรถา"ติ คาถมาห.

ตตฺถ ชีรนฺตีติ ชรํ ปาปุณนฺติ. ราชรถาติ รญฺโญ อภิรูปา รถา. ๖- สุจิตฺตาติ สุวณฺณรชตาทีหิ สุฏฺฐุ จิตฺตา. ๗- อโถ สรีรมฺปิ ชรํ อุเปตีติ เอวรูเปสุ อนุปาทินฺนเกสุ สารทารุมเยสุ รเถสุ ชรนฺเตสุ ๘- อิมสฺมึ อชฺฌตฺติเก อุปาทินฺนเก