๘. ปิณฺฑสุตฺตวณฺณนา

[๑๕๔] อฏฺฐเม ปาหุนกานิ ภวนฺตีติ ตถารูเป นกฺขตฺเต ตตฺถ ตตฺถ เปเสตพฺพานิ ปโหนกานิ ๓- ภวนฺติ. อาคนฺตุกปณฺณาการทานานิ วา. สยํ จรณทิวโส ๔- กิร โส. สมวยชาติโคตฺตา กุมารกา ตโต ตโต สนฺนิปตนฺติ. กุมาริกาโยปิ อตฺตโน อตฺตโน วิภวานุรูเปน อลงฺกตา ตหํ ตหํ วิจรนฺติ. ตตฺร กุมาริกาโยปิ ยถารุจิตานํ กุมารกานํ ปณฺณาการํ เปเสนฺติ, กุมารกาปิ กุมาริกานํ อญฺญสฺมึ อสติ อนฺตมโส มาลาคุเลนปิ ปริกฺขิปนฺติ. อนฺวาวิฏฺฐาติ อนุอาวิฏฺฐา. ตํทิวสํ กิร ปญฺจสตา กุมาริกาโย อุยฺยานกีฬํ คจฺฉนฺติโย ปฏิปเถ สตฺถารํ ทิสฺวา มนฺทปูวํ ๕- ทเทยฺยุํ, สตฺถา ตาสํ ทานานุโมทนตฺถํ ปกิณฺณกธมฺมเทสนํ เทเสยฺย, เทสนาปริโยสาเน สพฺพาปิ โสตาปตฺติผเล ปติฏฺฐเหยฺยุํ, มาโร ตาสํ สมฺปตฺติยา อนฺตรายํ กริสฺสามีติ อนฺวาวิสิ. ปาลิยํ ปน มา สมโณ โคตโม ปิณฺฑมลตฺถาติ. เอตฺตกํเยว วุตฺตนฺติ.

กึ ปน สตฺถา มาราวฏฺฏนํ อชานิตฺวา ปวิฏฺโฐติ. อาม อชานิตฺวา. กสฺมา? อนาวชฺชนกตาย. พุทฺธานํ หิ "อสุกฏฺฐาเน ภตฺตํ ลภิสฺสาม, น ลภิสฺสามา"ติ อาวชฺชนํ อนนุจฺฉวิกํ. ปวิฏฺโฐ ปน มนุสฺสานํ อุปจารเภทํ ทิสฺวา "กึ อิทนฺ"ติ อาวชฺเชนฺโต ญตฺวา "อามิสตฺถํ มาราวฏฺฏนํ ภินฺทิตุํปิ อนนุจฺฉวิกนฺ"ติ อภินฺทิตฺวาว นิกฺขนฺโต.