๘. ปิณฑิกสูตร

๘. ปิณฺฑสุตฺตวณฺณนา

อฏฺฐเม ปาหุนกานิ ภวนฺตีติ ตถารูเป นกฺขตฺเต ตตฺถ ตตฺถ เปเสตพฺพานิ ปโหนกานิ ๓- ภวนฺติ. อาคนฺตุกปณฺณาการทานานิ วา. สยํ จรณทิวโส ๔- กิร โส. สมวยชาติโคตฺตา กุมารกา ตโต ตโต สนฺนิปตนฺติ. กุมาริกาโยปิ อตฺตโน อตฺตโน วิภวานุรูเปน อลงฺกตา ตหํ ตหํ วิจรนฺติ. ตตฺร กุมาริกาโยปิ ยถารุจิตานํ กุมารกานํ ปณฺณาการํ เปเสนฺติ, กุมารกาปิ กุมาริกานํ อญฺญสฺมึ อสติ อนฺตมโส มาลาคุเลนปิ ปริกฺขิปนฺติ. อนฺวาวิฏฺฐาติ อนุอาวิฏฺฐา. ตํทิวสํ กิร ปญฺจสตา กุมาริกาโย อุยฺยานกีฬํ คจฺฉนฺติโย ปฏิปเถ สตฺถารํ ทิสฺวา มนฺทปูวํ ๕- ทเทยฺยุํ, สตฺถา ตาสํ ทานานุโมทนตฺถํ ปกิณฺณกธมฺมเทสนํ เทเสยฺย, เทสนาปริโยสาเน สพฺพาปิ โสตาปตฺติผเล ปติฏฺฐเหยฺยุํ, มาโร ตาสํ สมฺปตฺติยา อนฺตรายํ กริสฺสามีติ อนฺวาวิสิ. ปาลิยํ ปน มา สมโณ โคตโม ปิณฺฑมลตฺถาติ. เอตฺตกํเยว วุตฺตนฺติ.

กึ ปน สตฺถา มาราวฏฺฏนํ อชานิตฺวา ปวิฏฺโฐติ. อาม อชานิตฺวา. กสฺมา? อนาวชฺชนกตาย. พุทฺธานํ หิ "อสุกฏฺฐาเน ภตฺตํ ลภิสฺสาม, น ลภิสฺสามา"ติ อาวชฺชนํ อนนุจฺฉวิกํ. ปวิฏฺโฐ ปน มนุสฺสานํ อุปจารเภทํ ทิสฺวา "กึ อิทนฺ"ติ อาวชฺเชนฺโต ญตฺวา "อามิสตฺถํ มาราวฏฺฏนํ ภินฺทิตุํปิ อนนุจฺฉวิกนฺ"ติ อภินฺทิตฺวาว นิกฺขนฺโต.

@เชิงอรรถ: ๑ ฉ.ม. อุนฺทฺรียติ ๒ ฉ.ม. เตภูมกวฏฺฏํ ๓ ฉ.ม., อิ. ปาหุนกานิ

@๔ ฉ.ม. จรณทิวเส ๕ ฉ.ม. ฉณปูวํ * ฉ.ม. ฉผสฺสายตนสุตฺต....

อุปสงฺกมีติ อมิตฺตวิชเยน วิย ตุฏฺโฐ สกลคาเม กฏจฺฉุมตฺตมฺปิ ภตฺตํ อลภิตฺวา คามโต นิกฺขมนฺตํ ภควนฺตํ คามิยมนุสฺสเวเสน อุปสงฺกมิ. ตถาหํ กริสฺสามีติ อิทํ โย ๑- มุสา ภาสติ. เอวํ กิรสฺส อโหสิ "มยา เอวํ วุตฺเต ปุน ปวิสติ, ๒- อถ นํ คามทารกา `สกลคาเม จริตฺวา กฏจฺฉุภิกฺขํปิ อลภิตฺวา คามโต นิกฺขมฺม ปุน ปวิฏฺโฐสี'ติอาทีนิ วตฺวา อุปฺผณฺเฑสฺสนฺตี"ติ. ๓- ภควา ปน "สจายํ มํ เอวํ วิเหเฐสฺสติ, มุทฺธมสฺเสว สตฺตธา ผเลสฺสตี"ติ ตสฺมึ อนุกมฺปาย อปวิสิตฺวา คาถาทฺวยมาห.

ตตฺถ ปสวีติ ชเนสิ อุปฺปาเทสิ. ๔- อาสชฺชาติ อาสาเทตฺวา ฆเฏตฺวา. น เม ปาปํ วิปจฺจตีติ มม ปาปํ น วิปจฺจติ. นิปฺผลํ เอตนฺติ กึ นุ ตฺวํ เอวํ มญฺญสิ, มา เอวํ มญฺญสิ, ๕- อตฺถิ ตยา กตสฺส ปาปสฺส ผลนฺติ ทีเปติ. กิญฺจนนฺติ มทฺทิตุํ สมตฺถํ ราคกิญฺจนาทิกิเลสชาตํ. อาภสฺสรา ยถาติ ยถา อาภสฺสรา เทวา สปฺปีติกชฺฌาเนน ยาเปนฺตา ปีติภกฺขา นาม โหนฺติ, เอวํ ภวิสฺสามาติ. อฏฺฐมํ.