2. Devaputtasaṃyutta

1. Paṭhamavagga

1. Paṭhamakassapasuttavaṇṇanā

[82] Devaputtasaṃyuttassa paṭhame devaputtoti devānaṃ hi aṅke nibbattā purisā devaputtā nāma, itthiyo devadhītaro nāma honti. Nāmavasena apākaṭāva "aññatarā devatā"ti vuccati, pākaṭo "itthannāmo devaputto"ti. Tasmā heṭṭhā "aññatarā devatā"ti vatvā idha "devaputto"ti vuttaṃ. Anusāsanti anusiṭṭhiṃ. Ayaṃ kira devaputto bhagavatā sambodhito sattame vasse yamakapāṭihāriyaṃ katvā tidasapure vassaṃ upagamma abhidhammaṃ desentena jhānavibhaṅge "bhikkhūti samaññāya bhikkhu, paṭiññāya bhikkhū"ti evaṃ bhikkhuniddesaṃ kathiyamānaṃ assosi. "evaṃ vitakketha, mā evaṃ vitakkayittha, evaṃ manasikarotha, mā evaṃ manasākattha, idaṃ pajahatha, idaṃ upasampajja viharathā"ti evarūpaṃ pana bhikkhuovādaṃ bhikkhuanusāsanaṃ na assosi. So taṃ sandhāya "bhikkhuṃ bhagavā pakāsesi, no ca bhikkhuno anusāsan"ti āha.