Tena hīti yasmā mayā bhikkhuno anusiṭṭhī na pakāsitāti vadesi tasmā. Taññevettha paṭibhātūti tuyhevesā anusiṭṭhippakāsanā upaṭṭhātūti. Yo hi pañhaṃ kathetukāmo hoti, na ca sakkoti sabbaññutañāṇena saddhiṃ saṃsanditvā kathetuṃ. Yo vā na kathetukāmo hoti, sakkoti pañhaṃ kathetuṃ. Yo vā neva kathetukāmo hoti. Na kathetuṃ sakkoti. Sabbesaṃpi tesaṃ bhagavā pañhaṃ bhāraṃ na karoti. Ayaṃ pana devaputto kathetukāmo ceva, sakkoti ca kathetuṃ. Tasmā tasseva bhāraṃ karonto bhagavā evamāha. Sopi pañhaṃ kathesi.

Tattha subhāsitassa sikkhethāti subhāsitaṃ sikkheyya, catusaccanissitaṃ dasakathāvatthunissitaṃ sattatiṃsabodhipakkhiyanissitaṃ catubbidhaṃ vacīsucaritameva sikkheyya. Samaṇūpāsanassa

@3 cha.Ma., i. vadasi 4 cha.Ma., i. pana 5 cha.Ma., i. kathetuṃ na ca sakkoti Cāti samaṇehi upāsevitabbaṃ samaṇūpānaṃ aṭṭhatiṃsabhedaṃ kammaṭṭhānaṃ, taṃ sikkheyya bhāveyyāti attho. Bahussutānaṃ vā bhikkhūnaṃ upasaṅkamanaṃpi samaṇūpāsanaṃ, taṃpi "kiṃ bhante kusalan"tiādinā pañhapucchanena paññābuddhatthaṃ sikkheyya. Cittavūpasamassa cāti aṭṭhasamāpattivasena ca cittavūpasamaṃ sikkheyya. Iti devaputtena tisso sikkhā kathitā honti. Purimapadena hi adhisīlasikkhā kathitā, dutiyapadena adhipaññāsikkhā, cittavūpasamena adhicittasikkhāti evaṃ imāya gāthāya sakalaṃpi sāsanaṃ pakāsitameva hoti. Paṭhamaṃ.