@7 Sī., i. aññassa datvā 8 cha.Ma., i. ayaṃ pāṭho na dissati

Bhattābhihāre sudaṃ bhāsatīti kathaṃ bhāsati? bhagavatā anusiṭṭhiniyāmena. Bhagavā hi naṃ evaṃ anusāsi "māṇava imaṃ pattaṃ pana dhova pattaṭṭhāne mā avaca, rañño bhuñajanaṭṭhāne ṭhatvā paṭhamapiṇaḍādīsu ca avatvā avasānapiṇḍe gahite vadeyyāsi, rājā sutvāva bhattapiṇḍaṃ chaḍḍessati, atha rañño hatthesu dhotesu cāṭiṃ apanetvā sitthāni gaṇetvā tadūpikaṃ bayañjanaṃ ñatvā punadivase tāvattake taṇḍule hāreyyāsi, pātarāse vatvā sāyamāse mā vadeyyāsī"ti. So sādhūti paṭisuṇitvā taṃdivasaṃ rañño pātarāsaṃ bhutvā gatattā sāyamāse bhagavatā anusiṭṭhiniyāmena gāthaṃ abhāsi. Rājā dasabalassa vacanaṃ saritvā bhattapiṇḍaṃ cāṭiyaṃyeva chaḍḍesi. Rañño hatthesu dhotesu cāṭiṃ apanetvā sitthāni gaṇetvā punadivaseva tattake taṇḍule hariṃsu.

Nāḷikodanaparamatāya saṇṭhāsīti so kira māṇavo divase divase tathāgatassa santikaṃ gacchati, dasabalassa vissāsiko ahosi. Atha naṃ ekadivasaṃ pucchi "rājā kittakaṃ bhuñjatī"ti. So "nāḷikodanan"ti āha. Vaṭṭissati ettāvatā purisabhāgo esa, ito paṭṭhāya gāthaṃ mā vadīti. Iti rājā tattheva saṇṭhāti. Diṭṭhadhammikena ceva atthena samparāyikena cāti ettha sallikhitasarīratā diṭṭhadhammikattho nāma, sīlaṃ samparāyikattho. Bhojane mattaññutā hi sīlaṅgannāma hotīti. Tatiyaṃ.