๕. อัตตรักขิตสูตร

TIPITAKA Volume 15 : PALI ROMAN Sutta Pitaka Vol 7 : Sutta. Saṃ. Sa. Pañcamaṃ attarakkhitasuttaṃ

[337] Ekamantaṃ nisinno kho rājā pasenadikosalo bhagavantaṃ etadavoca idha mayhaṃ bhante rahogatassa paṭisallīnassa evaṃ cetaso @Footnote: 1 Sī. jahate . 2 Sī. kiñca . 3 Ma. taṃva . 4 Ma. taṃvassa taṃ. Parivitakko udapādi kesaṃ nu kho rakkhito attā kesaṃ nu kho 1- arakkhito attāti tassa mayhaṃ bhante etadahosi ye ca kho keci kāyena duccaritaṃ caranti vācāya duccaritaṃ caranti manasā duccaritaṃ caranti tesaṃ arakkhito attā kiñcāpi te hatthikāyo vā rakkheyya assakāyo vā rakkheyya rathakāyo vā rakkheyya pattikāyo vā rakkheyya atha kho tesaṃ arakkhito attā taṃ kissa hetu bāhirā hesā rakkhā nesā rakkhā ajjhattikā tasmā tesaṃ arakkhito attāti ye ca kho keci kāyena sucaritaṃ caranti vācāya sucaritaṃ caranti manasā sucaritaṃ caranti tesaṃ rakkhito attā kiñcāpi te neva hatthikāyo rakkheyya na assakāyo rakkheyya na rathakāyo rakkheyya na pattikāyo rakkheyya atha kho tesaṃ rakkhito attā taṃ kissa hetu ajjhattikā hesā rakkhā nesā rakkhā bāhirā tasmā tesaṃ rakkhito attāti.