๕. ทุติยสังคามวัตถุสูตร

Atha kho rājā māgadho ajātasattu vedehiputto caturaṅginiṃ senaṃ sannayhitvā rājānaṃ pasenadikosalaṃ abbhuyyāsi yena kāsi . assosi kho rājā pasenadikosalo rājā kira māgadho ajātasattu vedehiputto caturaṅginiṃ senaṃ sannayhitvā mamaṃ abbhuyyāto yena kāsīti . atha kho rājā pasenadikosalo caturaṅginiṃ senaṃ sannayhitvā rājānaṃ māgadhaṃ ajātasattuṃ vedehiputtaṃ paccuyyāsi yena kāsi . atha kho rājā ca māgadho ajātasattu vedehiputto rājā ca pasenadikosalo saṅgāmesuṃ . tasmiṃ kho pana saṅgāme rājā pasenadikosalo rājānaṃ māgadhaṃ ajātasattuṃ vedehiputtaṃ parājesi jīvaggāhañca naṃ aggahesi.

Atha kho rañño pasenadikosalassa etadahosi kiñcāpi kho myāyaṃ rājā māgadho ajātasattu vedehiputto adubbhantassa dubbhati atha ca pana me bhāgineyyo hoti yannūnāhaṃ rañño māgadhassa ajātasattuno vedehiputtassa sabbaṃ hatthikāyaṃ pariyādiyitvā sabbaṃ assakāyaṃ pariyādiyitvā sabbaṃ rathakāyaṃ pariyādiyitvā Sabbaṃ pattikāyaṃ pariyādiyitvā jīvantameva naṃ ossajjeyyanti . Atha kho rājā pasenadikosalo rañño māgadhassa ajātasattuno vedehiputtassa sabbaṃ hatthikāyaṃ pariyādiyitvā sabbaṃ assakāyaṃ pariyādiyitvā sabbaṃ rathakāyaṃ pariyādiyitvā sabbaṃ pattikāyaṃ pariyādiyitvā jīvantameva naṃ ossajji.

Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisiṃsu sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te bhikkhū bhagavantaṃ etadavocuṃ {374.1} idha bhante rājā māgadho ajātasattu vedehiputto caturaṅginiṃ senaṃ sannayhitvā rājānaṃ pasenadikosalaṃ abbhuyyāsi yena kāsi assosi kho bhante rājā pasenadikosalo rājā kira māgadho ajātasattu vedehiputto caturaṅginiṃ senaṃ sannayhitvā mamaṃ abbhuyyāto yena kāsīti atha kho bhante rājā pasenadikosalo caturaṅginiṃ senaṃ sannayhitvā rājānaṃ māgadhaṃ ajātasattuṃ vedehiputtaṃ paccuyyāsi yena kāsi atha kho bhante rājā ca māgadho ajātasattu vedehiputto rājā ca pasenadikosalo saṅgāmesuṃ tasmiṃ kho pana bhante saṅgāme rājā pasenadikosalo rājānaṃ māgadhaṃ ajātasattuṃ vedehiputtaṃ parājesi jīvaggāhañca naṃ aggahesi atha kho bhante rañño Pasenadikosalassa etadahosi kiñcāpi kho myāyaṃ rājā māgadho ajātasattu vedehiputto adubbhantassa dubbhati atha ca pana me bhāgineyyo hoti yannūnāhaṃ rañño māgadhassa ajātasattuno vedehiputtassa sabbaṃ hatthikāyaṃ pariyādiyitvā sabbaṃ assakāyaṃ sabbaṃ rathakāyaṃ sabbaṃ pattikāyaṃ pariyādiyitvā jīvantameva naṃ ossajjeyyanti. Atha kho bhante rājā pasenadikosalo rañño māgadhassa ajātasattuno vedehiputtassa sabbaṃ hatthikāyaṃ pariyādiyitvā sabbaṃ assakāyaṃ pariyādiyitvā sabbaṃ rathakāyaṃ pariyādiyitvā sabbaṃ pattikāyaṃ pariyādiyitvā jīvantameva naṃ ossajjīti.

Atha kho bhagavā etamatthaṃ viditvā tāyaṃ velāyaṃ imā gāthāyo abhāsi vilumpateva puriso yāvassa upakappati yadā caññe vilumpanti so vilutto vilumpati 1- ṭhānañhi maññatī bālo yāva pāpaṃ na paccati yadā ca paccati pāpaṃ atha [bālo] dukkhaṃ nigacchati labhati hantā hantāraṃ jetāraṃ labhate jayaṃ akkosako ca akkosaṃ rosetārañca rosako 2- atha kammavivaṭṭena so vilutto vilumpatīti. @Footnote: 1 Ma. viluppati . 2 Sī. rosato paṭirosakotipi rosato ca parosakotipi pāṭho.