๒. โสมาสูตร

Sāvatthīnidānaṃ . atha kho somā bhikkhunī pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi sāvatthiyaṃ piṇḍāya caritvā pacchābhattaṃ piṇḍapātapaṭikkantā yena andhavanaṃ tenupasaṅkami divāvihārāya andhavanaṃ ajjhogahetvā 1- aññatarasmiṃ rukkhamūle divāvihāraṃ nisīdi.

Atha kho māro pāpimā somāya bhikkhuniyā bhayaṃ chambhitattaṃ lomahaṃsaṃ uppādetukāmo samādhimhā cāvetukāmo yena somā bhikkhunī tenupasaṅkami upasaṅkamitvā somaṃ bhikkhuniṃ gāthāya ajjhabhāsi yantaṃ isīhi pattabbaṃ ṭhānaṃ durabhisambhavaṃ na taṃ dvaṅgulapaññāya sakkā pappotumitthiyāti.

Atha kho somāya bhikkhuniyā etadahosi ko nu kho ayaṃ manusso vā amanusso vā gāthaṃ bhāsatīti . atha kho somāya @Footnote: 1 Po. Ma. ajjhogāhetuvā. Bhikkhuniyā etadahosi māro kho ayaṃ pāpimā mama bhayaṃ chambhitattaṃ lomahaṃsaṃ uppādetukāmo samādhimhā cāvetukāmo gāthaṃ bhāsatīti . Atha kho somā bhikkhunī māro ayaṃ pāpimā iti viditvā māraṃ pāpimantaṃ gāthāhi ajjhabhāsi itthībhāvo kiṃ kayirā cittamhi susamāhite ñāṇamhi vattamānamhi sammā dhammaṃ vipassato yassa nūna siyā evaṃ itthīhaṃ purisoti vā kiñci vā pana asmīti taṃ māro vattumarahatīti. Atha kho māro pāpimā jānāti maṃ somā bhikkhunīti dukkhī dummano tatthevantaradhāyīti.