๘. สีสุปจาลาสูตร

๘. สีสุปจาลาสุตฺตวณฺณนา

อฏฺฐเม สมณี วิย ทิสฺสสีติ สมณีสทิสา ทิสฺสสิ. กิมิว จรสิ โมมูหาติ กึการณา โมมูหา วิย จรสิ. อิโต พหิทฺธาติ อิมมฺหา สาสนา พหิทฺธา. ๑- ปาสํ เฑนฺตีติ ๒- ปาสณฺฑา, สตฺตานํ จิตฺเตสุ ทิฏฺฐิปาสํ ขิปนฺตีติ อตฺโถ. สาสนํ ปน ปาเส โมเจสิ, ๓- ตสฺมา ปาสณฺโฑติ น วุจฺจติ, อิโต พหิทฺธาเยว ปาสณฺฑา โหนฺติ. สํสีทนฺตีติ ๔- สํสีทนฺติ ลคฺคนฺติ.

อิทานิ "กํ นุ อุทฺทิสฺส มณฺฑาสี"ติ ปญฺหํ กเถนฺตี อตฺถิ สกฺยกุเล ชาโตติอาทิมาห. ตตฺถ สพฺพาภิภูติ สพฺพานิ ขนฺธายตนธาตุภวโยนิคติอาทีนิ อภิภวิตฺวา ฐิโต. มรณมาราทโย นุทิ นีหรีติ มารนุโท. สพฺพตฺถมปราชิโตติ สพฺเพสุ ราคาทีสุ วา มารยุทฺเธ วา อชฺชิโต. สพฺพตฺถ มุตฺโตติ สพฺเพสุ ขนฺธาทีสุ มุตฺโต. อสิโตติ ตณฺหาทิฏฺฐินิสฺสเยน อนิสฺสิโต. สพฺพกมฺมกฺขยนฺติ สพฺพกมฺมกฺขยสงฺขาตํ อรหตฺตํ ปตฺโต. อุปธิสงฺขเยติ อุปธิสงฺขยสงฺขาเต นิพฺพาเน อารมฺมณโต วิมุตฺโต. อฏฺฐมํ.

@เชิงอรรถ: ๑ ฉ.ม. พหิ ๒ อิ. ปาสํ โอฑฺเฑนฺตีติ ๓ ฉ.ม. โมเจติ ๔ ฉ.ม. ปสีทนฺตีติ