๕. มานัตถัทธสูตร

5. Mānatthaddhasuttavaṇṇanā

Pañcame mānatthaddhoti vātabharitabhastā viya mānena thaddho. Ācariyanti sippuggahaṇakāle ācariyo anabhivādentassa sippaṃ na deti, aññasmiṃ pana kāle taṃ anabhivādeti, atthibhāvaṃpissa na jānāti. Nāyaṃ samaṇoti evaṃ kirassa ahosi "yasmā ayaṃ samaṇo mādise jātisampanne brāhmaṇe sampatte paṭisanthāramattaṃpi na karoti, tasmā na kiñci jānātī"ti.

Abbhūtacittajātāti abhūtapubbāya bhūtāya 1- tuṭṭhiyā samannāgatā. Kesu cassāti kesu bhaveyya. Kyassāti ke assa puggalassa. apacitā assūti apacitiṃ dassetuṃ yuttā bhaveyyuṃ. Arahanteti imāya gāthāya desanākusalattā attānaṃ anto katvā pūjaneyyaṃ dasseti. Pañcamaṃ.