๑๑. สังครวสูตร

Sāvatthīnidānaṃ . tena kho pana samayena saṅgaravo nāma brāhmaṇo sāvatthiyaṃ paṭivasati udakasuddhiko udakena suddhiṃ 2- pacceti sāyapātaṃ udakorohaṇānuyogamanuyutto viharati . atha kho āyasmā ānando pubbaṇhasamayaṃ nivāsetvā pattacīvaramādāya sāvatthiyaṃ piṇḍāya pāvisi sāvatthiyaṃ piṇḍāya caritvā pacchābhattaṃ piṇḍapātapaṭikkanto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi.

Ekamantaṃ nisinno kho āyasmā ānando bhagavantaṃ etadavoca idha bhante saṅgaravo nāma brāhmaṇo sāvatthiyaṃ paṭivasati udakasuddhiko udakena suddhiṃ pacceti sāyapātaṃ udakorohaṇānuyogamanuyutto viharati sādhu bhante bhagavā yena saṅgaravassa brāhmaṇassa nivesanaṃ tenupasaṅkamatu anukampaṃ upādāyāti . Adhivāsesi bhagavā tuṇhībhāvena . atha kho bhagavā pubbaṇhasamayaṃ nivāsetvā pattacīvaramādāya yena saṅgaravassa brāhmaṇassa nivesanaṃ @Footnote: 1 Ma. Yu. bāhitvā. 2 Ma. parisuddhiṃ. Tenupasaṅkami upasaṅkamitvā paññatte āsane nisīdi.

Atha kho saṅgaravo brāhmaṇo yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinnaṃ kho saṅgaravaṃ brāhmaṇaṃ bhagavā etadavoca saccaṃ kira tvaṃ brāhmaṇa udakasuddhiko udakena suddhiṃ paccesi sāyapātaṃ udakorohaṇānuyogamanuyutto viharasīti . evaṃ bho gotamāti . kiṃ pana tvaṃ brāhmaṇa atthavasaṃ sampassamāno udakasuddhiko udakena suddhiṃ paccesi sāyapātaṃ udakorohaṇānuyogamanuyutto viharasīti . idha me bho gotama yaṃ divā pāpakammaṃ kataṃ hoti taṃ sayaṃ nhānena pavāhemi yaṃ rattiṃ pāpakammaṃ kataṃ hoti taṃ pātaṃ nhānena pavāhemi imaṃ ca khvāhaṃ bho gotama atthavasaṃ sampassamāno udakasuddhiko udakena suddhiṃ paccemi sāyapātaṃ udakorohaṇānuyogamanuyutto viharāmīti.

Dhammo rahado brāhmaṇa sīlatittho anāvilo sabbhi sataṃ pasattho yattha have vedaguno sinātā anallagattāva taranti pāranti.

Evaṃ vutte saṅgaravo brāhmaṇo bhagavantaṃ etadavoca abhikkantaṃ bho gotama abhikkantaṃ bho gotama .pe. upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṅgatanti.