๙. ปฐมปัชชุนนธีตุสูตร

๙. ปฐมปชฺชุนฺนธีตุสุตฺตวณฺณนา

นวเม ปชฺชุนฺนสฺส ธีตาติ ปชฺชุนฺนสฺส นาม วสฺสวลาหกเทวรญฺโญ จาตุมฺมหาราชิกสฺส ธีตา. อภิวนฺเทติ ภควา ตุมฺหากํ ปาเท วนฺทามิ. จกฺขุมตาติ ปญฺจหิ จกฺขูหิ จกฺขุมนฺเตน ตถาคเตน. ธมฺโม อนุพุทฺโธติ "อิทํ มยา ปุพฺเพ ปเรสํ สนฺติเก เกวลํ สุตํเยว อสี"ติ วทติ. สาหํทานีติ สา อหํ อิทานิ. สกฺขิ ชานามีติ ปฏิเวธวเสน ปจฺจกฺขเมว ชานามิ. วิครหนฺตาติ "หีนกฺขรปทพฺยญฺชโน"ติ วา "อนิยฺยานิโก"ติ วา เอวํ ครหนฺตา. โรรุวนฺติ เทฺว โรรุวา ธูมโรรุโว จ ชาลโรรุโว จ. ตตฺถ ธูมโรรุโว วิสุํ โหติ, ชาลโรรุโวติ ปน อวีจิมหานิรยสฺเสเวตํ นามํ. ตตฺถ หิ สตฺตา อคฺคิมฺหิ ชลนฺเต ชลนฺเต ปุนปฺปุนํ รวํ รวนฺติ, ตสฺมา โส "โรรุโว"ติ วุจฺจติ. โฆรนฺติ ทารุณํ. ขนฺติยา อุปสเมน อุเปตาติ รุจิตฺวา ขเมตฺวา คหณขนฺติยา จ ราคาทิอุปสเมน จ อุเปตาติ. นวมํ.