๗. วนโรปสูตร

๗. วนโรปสุตฺตวณฺณนา

สตฺตเม ธมฺมฏฺฐา สีลสมฺปนฺนาติ เก ธมฺมฏฺฐา, เก สีลสมฺปนฺนาติ ปุจฺฉติ. ภควา อิมํ ปญฺหํ ตาว วตฺถุนา ๑- ทีเปนฺโต อารามโรปาติอาทิมาห. ตตฺถ อารามโรปาติ ปุปฺผารามผลารามโรปกา. วนโรปาติ สยํ ชาเต อโรปิตวเน ๒- สีมํ ปริกฺขิปิตฺวา เจติยโพธิจงฺกมนมณฺฑปกุฏิเลณรตฺติฏฺฐานทิวาฏฺฐานานํ การกา ฉายูปเค รุกฺเข โรเปตฺวา ททมานาปิ วนโรปาเยว นาม. เสตุการกาติ วิสเม เสตุํ กโรนฺติ, อุทเก นาวํ ปฏิยาเทนฺติ. ปปนฺติ ปานียทานสาลํ. อุทปานนฺติ ยํ กิญฺจิ โปกฺขรณีตฬากาทึ. ๓- อปสฺสยนฺติ ๔- วาสาคารํ. "อุปาสยนฺ"ติปิ ปาโฐ.

สทา ปุญฺญํ ปวฑฺฒตีติ น อกุสลวิตกฺกํ วา วิตกฺเกนฺตสฺส นิทฺทายนฺตสฺส วา ปวฑฺฒติ. ยทา ๕- ปน อนุสฺสรติ, ตทา ปวฑฺฒตีติ ๖- อิมมตฺถํ สนฺธาย "สทา ปุญฺญํ ปวฑฺฒตี"ติ วุตฺตํ. ธมฺมฏฺฐา สีลสมฺปนฺนาติ ตสฺมึ ธมฺเม ฐิตตฺตา เตนปิ สีเลน สมฺปนฺนตฺตา ธมฺมฏฺฐา สีลสมฺปนฺนา. อถวา เอวรูปานิ ปุญฺญานิ กโรนฺตานํ ทส กุสลธมฺมา ปูเรนฺติ, เตสุ ฐิตตฺตา ธมฺมฏฺฐา. เตเนว จ สีเลน สมฺปนฺนตฺตา สีลสมฺปนฺนาติ. สตฺตมํ.