๓. วิตตสูตร

๓. วิตฺตสุตฺตวณฺณนา

ตติเย สทฺธีธ วิตฺตนฺติ ยสฺมา สทฺโธ สทฺธาย มุตฺตามณิอาทีนิปิ วิตฺตานิ ลภติ, ติสฺโสปิ กุลสมฺปทา, ฉ กามสคฺคานิ, นว พฺรหฺมโลเก ปตฺวา ปริโยสาเน อมตมหานิพฺพานทสฺสนํปิ ลภติ. ตสฺมา มณิมุตฺตาทีหิ วิตฺเตหิ สทฺธาวิตฺตเมว เสฏฺฐํ. ธมฺโมติ ทสกุสลกมฺมปโถ. สุขมาวหาตีติ ๒- สพฺพสาสวานาสวํ อสงฺกิลิฏฺฐสุขํ อาวหติ. สาธุตรนฺติ โลกสฺมึ โลณมฺพิลาทีนํ สพฺพรสานํ สจฺจเมว มธุรตรํ. สจฺจสฺมึ หิ ฐิตา สีฆเวคํ นทึปิ นิวตฺเตนฺติ, วิสํปิ นิมฺมทฺเทนฺติ, อคฺคึปิ ปฏิพาหนฺติ, เทวํปิ วสฺสาเปนฺติ, ตสฺมา ตํ สพฺพรสานํ มธุรตรนฺติ วุตฺตํ. ปญฺญาชีวึ ชีวิตมาหุ เสฏฺฐนฺติ โย ปญฺญาชีวี คหฏฺโฐ สมาโน ปญฺจสุ สีเลสุ ปติฏฺฐาย สลากภตฺตาทีนิ ปฏฺฐเปตฺวา ปญฺญาย ชีวติ, ปพฺพชิโต วา ปน ธมฺเมน อุปฺปนฺเน ปจฺจเย "อิทมตฺถี"ติ ๔- ปจฺจเวกฺขิตฺวา ปริภุญฺชนฺโต กมฺมฏฺฐานํ อาทาย วิปสฺสนํ ปฏฺฐเปตฺวา อริยผลาธิคมวเสน ปญฺญาย ชีวติ, ตํ ปญฺญาชีวึ ปุคฺคลํ เสฏฺฐํ ชีวิตํ ชีวตีติ อาหุ. ตติยํ.