๖. นชีรติสูตร

๖. นชีรติสุตฺตวณฺณนา

ฉฏฺเฐ นามโคตฺตํ น ชีรตีติ อตีตพุทฺธานํ ยาวชฺชทิวสา นามโคตฺตํ กถิยติ, ตสฺมา น ชีรตีติ วุจฺจติ. โปราณา ๔- ปน "อทฺธาเน คจฺฉนฺเต น ปญฺญายิสฺสติ, ชีรณสภาวํ ๕- ปน น โหติเยวา"ติ วทนฺติ. อาลสฺยนฺติ อาลสิยํ, เยน ฐิตฏฺฐาเน ฐิโตว, นิสินฺนฏฺฐาเน นิสินฺโนว โหติ, เกเสปิ อุตฺตรนฺเต ตินฺเต ๖- น กโรติ. ปมาโทติ นิทฺทาย วา กิเลสวเสน วา ปมาโท. อนุฏฺฐานนฺติ กมฺมสมเย กมฺมกรณวิริยาภาโว. อสญฺญโมติ สีลสญฺญมาภาโว วิสฏฺฐาจารตา. นิทฺทาติ โสปฺปพหุลตาย ๗- คจฺฉนฺโตปิ ฐิโตปิ นิสินฺโนปิ นิทฺทายติ, ปเคว นิปนฺโน. ตนฺทีติ อติจฺฉาตาทิวเสน อาคนฺตุกาลสิยํ. เต ฉิทฺเทติ ตานิ ฉ ฉิทฺทานิ ฉ วิวารานิ. สพฺพโสติ สพฺพากาเรน. ตนฺติ นิปาตมตฺตํ. วิวชฺชเยติ วิวชฺเชยฺย ๘- ชเหยฺย. ฉฏฺฐํ.

@เชิงอรรถ: ๑ ฉ.ม., อิ.....องฺคํ ๒ ฉ.ม., อิ. พหฺวนฺนปานํ ๓ ฉ.ม., อิ. มนญฺจา"ติ

@๔ ม. โปราณนามสฺส ๕ ฉ.ม., อิ. ชีรณสภาโว

@๖ ฉ.ม., อิ. เตเลปิ อุตฺตรนฺเต ฐิตึ น กโรติ ๗ ฉ.ม. โสปฺปพหุลตา. ตาย...

@๘ ฉ.ม., อิ. วชฺเชยฺย