4. Aññatitthiyasuttavaṇṇanā

[24] Catutthe pāvisīti paviṭṭho. So ca na tāva paviṭṭho, "pavisissāmī"ti nikkhantattā pana evaṃ vutto. Yathākiṃ? yathā "gāmaṃ gamissāmī"ti nikkhantapuriso taṃ gāmaṃ appattopi "kahaṃ itthannāmo"ti vutte "gāmaṃ gato"ti vuccati, evaṃ. Atippagoti tadā kira therassa atippagoyeva nikkhantadivaso ahosi, atippagoyeva nikkhantabhikkhū bodhiyaṅgaṇe cetiyaṅgaṇe niccapārupanaṭṭhāneti imesu ṭhānesu yāva bhikkhācāravelā hoti, tāva papañcaṃ karonti. Therassa pana "yāva bhikkhācāravelā hoti, tāva paribbājakehi saddhiṃ ekaṃ dve kathāvāre karissāmī"ti cintayato yannūnāhanti etadahosi. Paribbājakānaṃ ārāmoti so kirārāmo dakkhiṇadvārassa ca veḷuvanassa ca antarā ahosi. Idhāti imesu catūsu ṭhānesu. Kiṃvādī kimakkhāyīti kiṃ vadati kiṃ ācikkhati, kiṃ ettha samaṇassa gotamassa dassananti pucchanti. Dhammassa cānudhammaṃ byākareyyāmāti bhotā gotamena yaṃ vuttaṃ kāraṇaṃ, tassa anukāraṇaṃ katheyyāma. Sahadhammiko vādānupātoti parehi vuttakāraṇena sakāraṇo hutvā samaṇassa gotamassa vādānupāto vādappavatti viññūhi garahitabbaṃ kāraṇaṃ koci appamattakopi kathaṃ nāgaccheyya. Idaṃ vuttaṃ hoti:- kathaṃ saccākārenapi samaṇassa gotamassa vāde gārayhakāraṇaṃ na bhaveyyāti.

@3 cha.Ma. vādesu 4 cha.Ma., i. sabbākārenapi