8. Cetanāsuttavaṇṇanā

[38] Aṭṭhame yañca bhikkhave cetetīti yaṃ cetanaṃ ceteti, pavattetīti attho. Yañca pakappetīti yaṃ pakappanaṃ pakappeti, pavatteticceva attho. Yañca anusetīti yañca anusayaṃ anuseti, pavatteticceva attho. Ettha ca cetetīti tebhūmikakusalākusalacetanā gahitā, pakappetīti aṭṭhasu lobhasahagatacittesu taṇhādiṭṭhikappā gahitā, anusetīti dvādasannaṃ cetanānaṃ sahajātakoṭiyā ceva upanissayakoṭiyā ca anusayo gahito. Ārammaṇametaṃ hotīti etaṃ cetanādidhammajātaṃ paccayo hoti. Paccayo hi idha ārammaṇanti adhippeto. Viññāṇassa ṭhitiyāti kammaviññāṇassa ṭhitatthaṃ. Ārammaṇe satīti tasmiṃ paccaye sati. Patiṭṭhā viññāṇassa hotīti tassa kammaviññāṇassa patiṭṭhā hoti. Tasmiṃ patiṭṭhite viññāṇeti tasmiṃ kammaviññāṇe patiṭṭhite. Viruḷheti kammaṃ jirāpetvā paṭisandhiākaḍḍhanasamatthatāya nibbattimūle jāte. Punabbhavābhinibbattīti punabbhavasaṅkhātā abhinibbatti.

No ca bhikkhave cetetīti iminā tebhūmikacetanāya appavattakkhaṇo vutto. No ca pakappetīti iminā taṇhādiṭṭhikappānaṃ appavattakkhaṇo.