๗. อุปปาทสูตร

[๔๑๔] สาวตฺถิยํ วิหรติ ... ตตฺร โข ภควา ... โย ภิกฺขเว ปฐวีธาตุยา อุปฺปาโท ฐิติ อภินิพฺพตฺติ ปาตุภาโว ทุกฺขสฺเสโส อุปฺปาโท โรคานํ ฐิติ ชรามรณสฺส ปาตุภาโว ฯ โย อาโปธาตุยา ... โย เตโชธาตุยา ... โย วาโยธาตุยา อุปฺปาโท ฐิติ อภินิพฺพตฺติ ปาตุภาโว ทุกฺขสฺเสโส อุปฺปาโท โรคานํ ฐิติ ชรามรณสฺส ปาตุภาโว ฯ

[๔๑๕] โย จ โข ภิกฺขเว ปฐวีธาตุยา นิโรโธ วูปสโม อตฺถงฺคโม ทุกฺขสฺเสโส นิโรโธ โรคานํ วูปสโม ชรามรณสฺส อตฺถงฺคโม ฯ โย อาโปธาตุยา นิโรโธ ... โย เตโชธาตุยา นิโรโธ ... โย วาโยธาตุยา นิโรโธ วูปสโม อตฺถงฺคโม ทุกฺขสฺเสโส นิโรโธ โรคานํ วูปสโม ชรามรณสฺส อตฺถงฺคโมติ ฯ สตฺตมํ ฯ