๓. ปุตตสูตร

สาวตฺถิยํ วิหรติ ... ทารุโณ ภิกฺขเว ลาภสกฺการสิโลโก ฯเปฯ อธิคมาย ฯ

สทฺธา ภิกฺขเว อุปาสิกา เอกํ ปุตฺตกํ ๑ ปิยํ มนาปํ เอวํ สมฺมา อายาจมานา อายาเจยฺย ตาทิโส ตาต ภวาหิ ยาทิโส จิตฺโต จ คหปติ หตฺถโก จ อาฬวโกติ ฯ เอสา #๑ ม. ยุ. เอกปุตฺตกํ ฯ ภิกฺขเว ตุลา เอตํ ปมาณํ มม สาวกานํ อุปาสกานํ ยทิทํ จิตฺโต จ คหปติ หตฺถโก จ อาฬวโก ฯ สเจ โข ตฺวํ ตาต อคารสฺมา อนคาริยํ ปพฺพชสิ ตาทิโส ตาต ภวาหิ ยาทิสา สารีปุตฺตโมคฺคลฺลานาติ ฯ เอสา ภิกฺขเว ตุลา เอตํ ปมาณํ มม สาวกานํ ภิกฺขูนํ ยทิทํ สารีปุตฺตโมคฺคลฺลานา ฯ มา จ โข ตวํ ตาต เสกฺขํ อปฺปตฺตมานสํ ลาภสกฺการสิโลโก อนุปาปุณาตีติ ๑ ฯ ตญฺเจ ภิกฺขเว ภิกฺขุํ เสกฺขํ อปฺปตฺตมานสํ ลาภสกฺการสิโลโก อนุปาปุณาติ โส ตสฺส โหติ อนฺตรายาย ฯ เอวํ ทารุโณ โข ภิกฺขเว ลาภสกฺการสิโลโก ฯเปฯ เอวญฺหิ โว ภิกฺขเว สิกฺขิตพฺพนฺติ ฯ ตติยํ ฯ