๕. โอกิลินีสูตร

๕. โอกิลินีสุตฺตวณฺณนา

โอกิลินีวตฺถุสฺมึ อุปกฺกํ โอกิลินึ โอกิริณินฺติ สา กิร องฺคารจิตเก นิปนฺนา วิปฺผนฺทมานา วิปริวตฺตมานา ปจฺจติ, ตสฺมา โอปกฺกา เจว โหติ อุเณฺหน อคฺคินา ปกฺกสรีรา, โอกิลินี จ กิลินฺนสรีรา, พินฺทูนิสฺสา ๑- สรีรโต ปคฺฆรนฺติ, โอกิริณี จ องฺคารสมฺปริกิณฺณา. ตสฺสา หิ เหฏฺฐโตปิ กึสุกปุปฺผวณฺณา องฺคารา อุภยปสฺเสสุปิ, อากาสโตปิสฺสา อุปริ ปตนฺติ. เตน วุตฺตํ "อุปกฺกํ โอกิลินึ โอกิริณินฺ"ติ. สา อิสฺสาปกตา สปตึ องฺคารกฏาเหน โอกิรีติ ตสฺส กิร รญฺโญ เอกา นาฏกินี องฺคารกฏาหํ สมีเป ฐเปตฺวา คตฺตโต อุทกํ ปุญฺฉติ, ปาณินา จ เสทํ กโรติ. ราชาปิ ตาย สทฺธึ กถญฺจิ กโรติ, ปริตุฏฺฐาการญฺจ ทสฺเสสิ. อคฺคมเหสี ตํ อสหมานา อิสฺสาปกตา หุตฺวา อจิรปกฺกนฺตสฺส รญฺโญ ตํ องฺคารกฏาหํ คเหตฺวา ตสฺสา อุปริ องฺคาเร โอกิริ. สา ตํ กมฺมํ กตฺวา ตาทิสํเยว วิปากํ ปจฺจนุภวิตุํ เปตโลเก นิพฺพตฺตา. ปญฺจมํ.